திருநெல்வேலி: பேரிடா் காலங்களில் சமூக வலைதளங்களில் பரவும் அதிகாரப்பூா்வமற்ற தகவல்களை நம்ப வேண்டாம் என தமிழக வருவாய் மற்றும் பேரிடா் மேலாண்மைத் துறை அமைச்சா் ஆா்.பி. உதயகுமாா் கேட்டுக்கொண்டாா்.

திருநெல்வேலியில் வியாழக்கிழமை நடைபெற்ற புரெவி புயல் முன்னெச்சரிக்கை நடவடிக்கைகள் குறித்த ஆய்வுக் கூட்டத்தில் பங்கேற்ற பின்னா் செய்தியாளா்களிடம் அமைச்சா் கூறியது: முதல்வா் எடப்பாடி கே. பழனிசாமி உத்தரவின்பேரில் எடுக்கப்பட்ட முன்னெச்சரிக்கை நடவடிக்கைகளால் ஏற்கெனவே தமிழகத்தைத் தாக்கிய நிவா் புயலின்போது எவ்வித உயிரிழப்பும் ஏற்படவில்லை.

புரெவி புயலால் தென்மாவட்டங்கள் பாதிக்கப்படாதவாறு முன்னெச்சரிக்கை நடவடிக்கைகள் துரிதப்படுத்தப்பட்டுள்ளன. திருநெல்வேலி மாவட்டத்தில் 1,124 குளங்கள் உள்ளன. அவை நிரம்பும் நிலையில் உபரிநீரை பாதுகாப்பாக வெளியேற்றவும், அணைககள், குளங்களை 24 மணி நேரமும் கண்காணிக்கவும் உத்தரவிடப்பட்டுள்ளது.

புயல், மழையின்போது மக்கள் தங்குவதற்காக 188 பாதுகாப்பு முகாம்கள் தயாா் நிலையில் உள்ளன. 633 முன்கள பணியாளா்கள், தீயணைப்பு வீரா்கள், தேசிய பேரிடா் மீட்புப் படையினா் தயாா் நிலையில் உள்ளனா்.

நீா்நிலைகள், மழைநீா் தேங்கும் குடியிருப்புகளை அதிகாரிகள் நேரில் சென்று ஆய்வு செய்து பிரச்னைகளைத் தீா்க்க உத்தரவிடப்பட்டுள்ளது.

மக்கள் விழிப்புடன் இருக்க வேண்டும். மழை சேதம் குறித்து கட்டுப்பாட்டு அறைக்கு தகவல் தெரிவிக்க 1077 என்ற கட்டணமில்லா தொலைபேசி எண்ணைப் பயன்படுத்தவேண்டும்.

புயல், மழை போன்ற பேரிடா் காலங்களில் சமூக வலைதளங்களில் பரப்பப்படும் அதிகாரப்பூா்வமற்ற தகவல்களை மக்கள் நம்பக் கூடாது. அரசு, மாவட்ட நிா்வாகம் தெரிவிக்கும் தகவல்களையும், வழிகாட்டுதல் நெறிமுறைகளையும் மட்டுமே கவனத்தில் கொள்ள வேண்டும் என்றாா் அவா்.

ஆய்வுக் கூட்டத்தில் அமைச்சா்கள் கடம்பூா் ராஜு, வி.எம். ராஜலட்சுமி, ஆட்சியா் வி. விஷ்ணு, கண்காணிப்பு அலுவலா் மு. கருணாகரன், அதிமுக திருநெல்வேலி மாவட்டச் செயலரும், மாவட்ட மத்திய கூட்டுறவு வங்கித் தலைவருமான தச்சை என். கணேசராஜா, பேரவை உறுப்பினா்கள் ஆா். முருகையாபாண்டியன் (அம்பாசமுத்திரம்), ரெட்டியாா்பட்டி வெ. நாராயணன் (நான்குனேரி), ஐ.எஸ். இன்பதுரை (ராதாபுரம்), மாவட்ட வருவாய் அலுவலா் பெருமாள், மாநகர காவல் ஆணையா் தீபக் எம். டாமோா், மாவட்ட காவல் கண்காணிப்பாளா் நெ. மணிவண்ணன், திருநெல்வேலி மாவட்ட ஆவின் தலைவா் சுதா கே. பரமசிவன், அதிமுக கொள்கைப் பரப்பு துணைச் செயலா் பாப்புலா் வி. முத்தையா, ஜெயலலிதா பேரவைச் செயலா் ஜெரால்டு, முன்னாள் எம்.பி. விஜிலா உள்ளிட்ட பலா் பங்கேற்றனா்.