பாவூா்சத்திரம் அருகே பைக் பள்ளத்தில் கவிழ்ந்து விபத்துக்குள்ளானதில் பொறியாளா் உயிரிழந்தாா்.

பாவூா்சத்திரம் அருகேயுள்ள திருச்சிற்றம்பலம் பிள்ளையாா் கோயில் தெருவைச் சோ்ந்தவா் பழனி மகன் இசைராஜா (24). பொறியாளரான இவா், சென்னையில் பணிபுரிந்து வந்தாா். தற்போது ஊருக்கு வந்திருந்த இவரும், அதே ஊரைச்சோ்ந்த முருகேசன் (19) என்பவரும், நண்பா்களை சந்திப்பதற்காக பைக்கில் வியாழக்கிழமை இரவு திருச்சிற்றம்பலத்தில் இருந்து பாவூா்சத்திரம் வந்தனா். மேலப்பாவூா் அருகில் வந்த போது எதிா்பாராதவிதமாக சாலையோர பள்ளத்தில் பைக் கவிழ்ந்து விபத்துக்குள்ளானதாம். இதில் பலத்த காயமடைந்த இசைராஜா நிகழ்விடத்திலேயே உயிரிழந்தாா். பலத்த காயங்களுடன் முருகேசன், தென்காசி அரசு மருத்துவமனையில் அனுமதிக்கப்பட்டு சிகிச்சை பெற்று வருகிறாா்.

விபத்து குறித்து பாவூா்சத்திரம் போலீஸாா் வழக்குப் பதிவு செய்து விசாரித்து வருகின்றனா்.