தென்காசியில் 60 ஆண்டுகளுக்கும் மேலாக வாடகைக் கட்டடத்தில் இயங்கி வருகிறது நூலகம். இட வசதி குறைந்த, நெரிசலான பகுதியில் நூலகம் இயங்கி வருவதால் வாசகா்கள் மிகுந்த சிரமத்திற்குள்ளாகியுள்ளனா்.

தென்காசி வஉசி வட்டார நூலகம், கடந்த 15-10-1961முதல் செயல்பட்டு வருகிறது. இந்நூலகம் தொடங்கியது முதல் 50 ஆண்டுகளாக, சுவாமி சன்னதி பஜாா், அம்மன் சன்னதி பஜாா், ரயில்வே பீடா் சாலை என நகரின் மையப் பகுதியில் செயல்பட்டு வந்தது. பழைய பேருந்து நிலையத்திலிருந்து புதிய பேருந்து நிலையம் செல்லும் சாலையில் நூலகம் செயல்பட்டு வந்தே பாது, ரயில்வே மேம்பாலம் கட்டும் பணிக்காக இங்கிருந்து நூலகம் இடமாற்றம் செய்யப்பட்டது. தற்போது தென்காசி-திருநெல்வேலி பிரதான சாலையில் உள்ள சம்பாத்தெருவில் மிகவும் நெரிசலான கட்டடத்தில் கடந்த 10 ஆண்டுகளுக்கும் மேலாக நூலகம் இயங்கி வருகிறது. இந்நூலகத்தில் 51,078நூல்கள் உள்ளன. 10, 835 பதிவு செய்த உறுப்பினா்களும், 276 புரவலா்களும், 8 பெரும் புரவலா்களும் உள்ளனா். நாள்தோறும் இந்நூலகத்திற்கு 600 க்கும் மேற்பட்ட வாசகா்கள் வந்து செல்கின்றனா்.

இந்தக் கட்டடத்தில் பத்திரிகை பகுதி, குறிப்புதவி பகுதி, நூல் இருப்பு பகுதி, சிறுவா் மற்றும் பெண்கள் பகுதி, போட்டித் தோ்வுக்கு தயாராகும் மாணவா்களுக்கான தளம், கூட்ட அரங்கு, கணிப்பொறிப் பயன்பாடு பகுதி, நகல், ஸ்கேனிங், பிரிண்டிங் பகுதிகள் செயல்பட்டு வருகின்றன.

இந்நூலகத்தின் சிறப்பான செயல்பாடு காரணமாக, கடந்த 2019 ஆம் ஆண்டு நூலக வளா்ச்சிப் பணிக்கான மாநில அளவிலான சிறந்த வாசகா் வட்ட விருது தமிழக அரசால் வழங்கப்பட்டுள்ளது.

நூலகம் அமைந்துள்ள பகுதி பிரதான சாலையாகும். மிகுந்த இரைச்சலுடன், போக்குவரத்து நெரிசல் மிகுந்த பகுதியில் நூலகம் அமைந்துள்ளது. வாகனங்களை நிறுத்துவதற்கு இடவசதி கிடையாது. தற்போது மாவட்டத்தின் தலைநகரம் என்பதால், நூலகத்திற்கு வருகைதரும் வாசகா்களின் எண்ணிக்கை அதிகரித்து வருகிறது. ஆனால் போதிய இடவசதியின்மையால் வாசகா்கள் மிகுந்த சிரமத்திற்குள்ளாகியுள்ளனா்.

இதுகுறித்து தென்காசி தெற்கு மாவட்ட திமுக பொறுப்பாளா் பொ.சிவபத்மநாதன் கூறியது: சுதந்திரப் போராட்ட வீரா் வஉசியின் 150 ஆவது ஆண்டு விழாவை முன்னிட்டு தென்காசி மக்களின் நீண்ட நாள் கோரிக்கையான வஉசி நூலகத்தை மாவட்ட மைய நூலகமாக தரம் உயா்த்தி சொந்தக் கட்டடம் அமைத்து தர வேண்டும் என தமிழக முதல்வருக்கு கோரிக்கை மனு அளித்துள்ளேன் என்றாா் அவா்.

தென்காசி சட்டப்பேரவை உறுப்பினா் எஸ்.பழனிநாடாா் கூறியது: தென்காசி நூலகத்தை தரம் உயா்த்தவும், சொந்தக் கட்டடம் கட்டவும் தமிழக முதல்வரிடம் கோரிக்கை மனு அளித்து விரைவில் தீா்வு காண நடவடிக்கை எடுக்கப்படும் என்றாா்.

வஉசி வட்டார நூலக வாசகா் வட்ட தலைவா் எஸ்கே.பாலசுப்பிரமணியன் கூறியது: தென்காசி நூலகத்தை மாவட்ட மைய நூலகமாக தரம் உயா்த்த வேண்டும். அவ்வாறு தரம் உயா்த்தப்படும் போது, நூல்களின் எண்ணிக்கை 2 லட்சமாக உயரும். அனைத்து நாளிதழ்களும், இதழ்களும் பெறப்படும், போட்டித் தோ்வுக்கு அரசு சாா்பில் தனி பயிற்சி மையம் அமையும்,. கூடுதலாக நடமாடும் நூலகம், பைண்டிங் பிரிவு, இணையதளம் மூலம் மாநில மையநூலகம், மற்றும் அனைத்து மாவட்ட மைய நூலகங்களும் இணைக்கப்படும். இதன் மூலம் இதுவரை கிடைக்கப் பெறாத அரிய நூல்களை இங்கிருந்தே பயில வாய்ப்பு உருவாகும் என்றாா் அவா்.