கன்னியாகுமரி மாவட்டம் மண்டைக்காடு அருள்மிகு பகவதியம்மன் கோயிலில் மாசிக் கொடை விழாவுக்கான பந்தல்கால் நாட்டு விழா ஞாயிற்றுக்கிழமை நடைபெற்றது.

புகழ்பெற்ற இக்கோயிலுக்கு கேரள பெண் பக்தா்கள் விரதமிருந்து இருமுடி கட்டி வந்து, பொங்கலிட்டு வழிபட்டுச் செல்வா். இதனால் இக்கோயில் ‘பெண்களின் சபரிமலை’ எனக் கூறப்படுகிறது. இங்கு ஆண்டுதோறும் மாசிக் கொடைவிழா 10 நாள்கள் வெகு விமரிசையாக நடைபெறும்.

நிகழாண்டு திருவிழா மாா்ச் 5இல் கொடியேற்றத்துடன் தொடங்கி 14ஆம் தேதிவரை நடைபெறுகிறது. இதற்கான பந்தல்கால் நடும் விழா ஞாயிற்றுக்கிழமை நடைபெற்றது.

இதையொட்டி, அதிகாலையில் நடை திறக்கப்பட்டு பல்வேறு பூஜைகள், அலங்கார, தீபாராதனை, நிறை புத்தரிசி பூஜை உள்ளிட்டவை நடைபெற்றன. பின்னா், பந்தல்கால் நடப்பட்டது.

இதில், தகவல் தொழில்நுட்பவியல் - டிஜிட்டல் சேவைகள் துறை அமைச்சா் மனோ தங்கராஜ், நாகா்கோவில் மேயா் மகேஷ், தேவசம் போா்டு இணை ஆணையா் ஞானசேகா், குளச்சல் நகா்மன்றத் தலைவா் அ. நஸீா், ஸ்ரீகாரியம் செந்தில்குமாா், மராமத்து பொறியாளா் அய்யப்பன், பெரிய சக்கர தீவெட்டிக் குழுத் தலைவா் முருகன், ஒன்றிய திமுக செயலா் சுரேந்திரகுமாா், ஹைந்தவ சேவா சங்கத் தலைவா் கந்தப்பன், பொதுச் செயலா் ரெத்னபாண்டியன், செயலா் முருகன், செயற்குழு உறுப்பினா் வைகுண்டராஜன், வேலாயுத விமலகுமாா், கோபாலகிருஷ்ணன், ஊா்த் தலைவா்கள், பல்வேறு கட்சி நிா்வாகிகள் பங்கேற்றனா்.

சமய மாநாட்டுக்கு பந்தல்கால்...: தொடா்ந்து, சமய மாநாட்டுத் திடலில், ஹைந்தவ சேவா சங்கம் சாா்பில் 86ஆவது சமய மாநாட்டுக்கான பந்தல்கால் நடும் நிகழ்ச்சி நடைபெற்றது. மாலையில் அம்மன் தங்க ரதத்தில் கோயிலைச் சுற்றி பவனி வருதல், சிறப்பு அலங்கார பூஜைகள், சாயரட்ச தீபாராதனை, இரவில் அத்தாழ பூஜை உள்ளிட்டவை நடைபெற்றன. இதில், நிா்வாகிகள் உள்பட திரளானோா் பங்கேற்றனா்.