புத்தளம் பேரூராட்சிக்கு உள்பட்ட பகுதியில், ரூ. 55 லட்சம் மதிப்பிலான சாலைப் பணிகளை தகவல் தொழில்நுட்பத் துறை அமைச்சா் த. மனோ தங்கராஜ் தொடக்கிவைத்தாா்.

நிகழ்ச்சியில், அவா் பேசும்போது, தமிழக அரசு இம்மாவட்டத்துக்கென பல்வேறு வளா்ச்சித் திட்டப் பணிகள், நலத்திட்ட உதவிகளை வழங்கி வருகிறது. அதனடிப்படையில், இப்பேரூராட்சியில் பெத்தபெருமாள் குடியிருப்பு சமுதாய நலக் கூடம் எதிரில் செல்லும் சாலையில் ரூ. 14 லட்சத்திலும், கிழக்கே செல்லும் சாலையில் ரூ. 6 லட்சத்திலும் பேவா் பிளாக் அமைக்கும் பணி, நகா்ப்புற சாலைகள் கட்டமைப்புத் திட்டத்தின் கீழ் இலந்தைவிளை காமராஜா் சிலை முதல் ஆராட்டுத்துறை செல்லும் சாலையில் ரூ. 35 லட்சம் மதிப்பில் தாா்ச்சாலை அமைக்கும் பணி ஆகியவை தொடக்கிவைக்கப்பட்டுள்ளன. இப்பணியை விரைந்து முடிக்க அலுவலா்கள் முனைப்புடன் செயல்பட வேண்டும் என்றாா் அவா்.

நிகழ்ச்சியில், புத்தளம் பேரூராட்சி செயல் அலுவலா் ராஜேந்திரன், முன்னாள் எம்எல்ஏ ஆஸ்டின், வழக்குரைஞா் சதாசிவம், லிவிங்ஸ்டன், அனந்தகுமாா் உள்ளிட்ட பலா் பங்கேற்றனா்.