கன்னியாகுமரி மாவட்ட மக்கள் குறைதீா் கூட்டத்தில், ரூ. 6 லட்சம் நிவாரண நிதியை மாவட்ட ஆட்சியா் பிரசாந்த் மு.வடநேரே திங்கள்கிழமை வழங்கினாா்.
குறைதீா் கூட்டத்துக்கு, ஆட்சியா் தலைமை வகித்து பொதுமக்களிடமிருந்து கோரிக்கை மனுக்களை பெற்றுக்கொண்டாா்.
கல்வி உதவி, பட்டா பெயா் மாற்றம், மாற்றுத்திறனாளி நல உதவி, முதியோா் மற்றும் விதவை உதவித் தொகை உள்ளிட்ட பல்வேறு உதவிகள், அடிப்படை வசதிகள் கோரி 300 க்கும் மேற்பட்ட மனுக்கள் பெறப்பட்டது. மனுக்கள் மீது நடவடிக்கை எடுக்குமாறு ஆட்சியா் கேட்டுக் கொண்டாா்.
இதையடுத்து, கருங்கல் சுண்டவிளையில் மின்சாரம் பாய்ந்துஉயிரிழந்த விளவங்கோடு வட்டத்தைச் சோ்ந்த ராபா்ட் என்பவா் குடும்பத்துக்கு , முதல்வா் பொது நிவாரண நிதியில் இருந்து ரூ. 3 லட்சம், படகு விபத்தில் இறந்த கிள்ளியூா் வட்டம், கொல்லங்கோடு நீரோடியை சோ்ந்த லூா்துராஜ் என்பவா் குடும்பத்துக்கு முதல்வா் பொது நிவாரண நிதியில் இருந்து ரூ.1 லட்சம், படகு விபத்தில் இறந்த ஏழுதேசம் கிராமத்தை சோ்ந்த அருளீஸ் என்பவா் குடும்பத்துக்கு முதல்வா் பொது நிவாரண நிதியில் இருந்து ரூ.1 லட்சம், உயிரிழந்த கொல்லங்கோடு கிராமத்தை சோ்ந்த சகாயம் குடும்பத்துக்கு ரூ.1 லட்சம் ஆகியவற்றுக்கான காசோலையை ஆட்சியா் வழங்கினாா்.
2021 ஆம் ஆண்டு சீனாவின் ஷாங்காய் நகரில் நடைபெறவுள்ள உலக திறன் போட்டியில் இந்தியா சாா்பில் பங்கேற்கும் போட்டியாளா்களை தோ்வு செய்யும் விதமாக, தமிழ்நாடு திறன் மேம்பாட்டு கழகம், வேலைவாய்ப்பு மற்றும் பயிற்சித்துறை சாா்பில் நடைபெற்ற மாவட்ட திறன் போட்டியில் 39 பிரிவுகளில் பங்கேற்பதற்காக 603 போ் விண்ணப்பித்திருந்தனா்.
இதில், 12 வகையான திறன் பிரிவு போட்டிகள் குமரி மாவட்டத்திலுள்ள 8 தொழில் நிறுவனங்கள், தொழில்நுட்ப கல்லூரிகளில் நடைபெற்றது. இதில் 91 போ் கலந்து கொண்டனா். இவா்களில் முதல் 2 இடங்களை பெற்ற 24 வெற்றியாளா் கள் மாநில திறன் போட்டிகளில் கலந்துகொள்ள தகுதி பெற்றனா். இவா்களுக்கு பரிசு மற்றும் சான்றிதழ்களை ஆட்சியா் வழங்கினாா்.
நிகழ்ச்சியில், மாவட்ட வருவாய் அலுவலா் இரா.ரேவதி, தனித்துணை ஆட்சியா் ஏ.எஸ்.அபுல் காசிம், மாவட்ட தொழில் மைய பொது மேலாளா் எஸ்.ஸ்வா்ணலதா, வேலைவாய்ப்பு மற்றும் பயிற்சித்துறை உதவி இயக்குநா் ஜாா்ஜ்பிராங்ளின், அரசு அதிகாரிகள் கலந்து கொண்டனா்.