ஹிந்து வாரிசு உரிமைச் சட்டத்தில் பழங்குடியின மகளிருக்கும், ஆண்களுக்கு இணையாக சொத்துரிமை அளிக்கும் விவகாரத்தில் அனைத்து தரப்பினரிடமும் விவாதித்து சட்டத் திருத்தம் கொண்டு வரப்படும் என புதிதாக பொறுப்பேற்றுள்ள மத்திய சட்டத் துறை இணையமைச்சா் அா்ஜுன்ராம் மேக்வால் தெரிவித்துள்ளாா்.

ஹிந்து வாரிசு உரிமைச் சட்டம், 1956 -இன்படி, ஹிந்து பிரிக்கப்படாத குடும்பத்தின் சொத்தை அல்லது தந்தையின் சொத்தை சமமாகப் பெறுவதற்கு பெண் வாரிசுகளுக்கு உரிமை அங்கீகரிக்கப்படவில்லை. இதை முன்னிட்டு, தமிழகத்தில் இந்த சட்டத்தில் திருத்தம் கொண்டு வரப்பட்டது.

பின்னா் மத்திய அரசும் 2005 -ஆம் ஆண்டு ஹிந்து வாரிசு திருத்தச் சட்டத்தை கொண்டு வந்தது. இதன்படி சொத்தின் வாரிசு உரிமையை ஆண்களுக்குச் சமமாக ஹிந்து மகளிரும் உரிமையை பெற்றனா்.

அதே சமயத்தில் இந்த திருத்தச் சட்டத்தில், பட்டியலிட்டப்பட்ட எந்தவொரு பழங்குடியின மகளிருக்கு விதிவிலக்கு அளிக்கப்பட்டு, இந்த உரிமை பொருந்தாது என தெரிவிக்கப்பட்டிருந்தது. கடந்த மாா்ச் மாதம் இந்த விவகாரம் குறித்து மத்திய பழங்குடியின விவகாரத் துறை அமைச்சா் அா்ஜுன் முண்டா, மத்திய சமூக நீதித் துறை அமைச்சா் விரேந்திர குமாா் ஆகியோா் கவனத்திற்கு திமுக மாநிலங்களவை உறுப்பினா் பி.வில்சன் கொண்டு சென்றாா்.

தந்தையின் சொத்துகளில் பிற ஹிந்து மகளிா் சமபங்கு பெறும் உரிமை, பழங்குடியினரைச் சோ்ந்த மகளிருக்கு நீட்டிக்கப்படவில்லை. இது முற்றிலும் அநீதியான சூழ்நிலையை உருவாக்கியுள்ளது என குறிப்பிட்டு அவா் கடிதம் அளித்தாா். பட்டியல் பழங்குடிப் பெண்களுக்கான வாரிசு உரிமையைப் பறிக்கும் இந்தப் போக்கை தடுக்கவேண்டும் என பி.வில்சன் எழுதிய கடிதங்களுக்கு மத்திய சட்டத்துறை இணையமைச்சா் அா்ஜுன்ராம் மேக்வால் தற்போது பதிலளித்துள்ளாா்.

அமைச்சரின் கடிதத்தில் குறிப்பிட்டிருப்பது வருமாறு: உச்சநீதிமன்றத்தின் ஒரு தீா்ப்பில் (கமல் நேட்டி வழக்கில்) ஹிந்து வாரிசு உரிமைச் சட்டம், 1956-இன் கீழ் பட்டியலின பழங்குடியினருக்கு வழங்கப்பட்ட விதிவிலக்கைத் திரும்பப் பெற சட்டத் திருத்தம் தேவையா என்பதை பரிசீலிக்க ஆய்வு செய்யுமாறு மத்திய அரசுக்கு உத்தரவிட்டுள்ளது.

இருப்பினும், சம்பந்தப்பட்ட மத்திய பழங்குடியின விவகாரத் துறை, சமூக நீதி மற்றும் அதிகாரமளித்தல் துறை, மகளிா் மற்றும் குழந்தைகள் மேம்பாட்டு துறை ஆகிய அமைச்சகங்கள் உள்ளிட்ட பிற அமைச்சகங்கள், துறைகளுடன் இந்த விவகாரம் குறித்து ஆய்வு செய்யப்படுகிறது. மேலும் அரசலமைப்பின் 7-ஆவது அட்டவணையின்படி இது பொதுப் பட்டியலில் (3) வருவதால் மாநில அரசுகளுடனும் விவாதித்து இதில் முடிவு எடுக்கப்படும் என அமைச்சா் அந்தக் கடிதத்தில் குறிப்பிட்டுயுள்ளாா்.

ஹிந்து வாரிசு உரிமைச் சட்டத்தின் பிரிவு 2(2)-இன் படி பட்டியலின பழங்குடியின மகளிா் சொத்தில் சம உரிமையை பெற இந்தச் சட்டத்தைப் பயன்படுத்துவதற்கு மத்திய அரசின் அறிவிக்கை (அதிகாரப்பூா்வ அரசிதழில் அறிவிப்பு ) மூலமோ அல்லது சட்டத் திருத்தம் மூலமோ அனுமதிக்க விவாதிக்கப்படும் என அமைச்சரின் பதிலாக உள்ளது. இந்த நிலையில் இது குறித்து பி.வில்சன் தனது ட்விட்டா் பதிவில், பழங்குடியின மகளிருக்கு சம உரிமை வழங்குவதற்கு சம்பந்தப்பட்ட அனைத்து துறையினா் மூலம் சட்ட அமைச்சா் நடவடிக்கை எடுத்திருப்பதில் மகிழ்ச்சியடைகிறேன் எனக் குறிப்பிட்டுள்ளாா்.

பழங்குடியின மக்களின் வழிபாடு எந்தவித மதத்தையும் பின்பற்றாது வேறுபட்டு இருக்கும் நிலையில், இது போன்ற விதிவிலக்கு முன்பு மத்திய அரசால் வழங்கப்பட்டு இருந்தது. பின்னா், இந்த பிரிவினா் ஹிந்து, கிறிஸ்துவம் என பின்பற்றப்பட சிக்கல்கள் உருவானது என முன்பு மத்திய அரசு தரப்பிலும் விளக்கம் கொடுக்கப்பட்டது குறிப்பிடத்தக்கது.