தில்லி மாநகராட்சி மேயா் தோ்தலை உரிய காலக்கெடுவுக்குள் நடத்த உத்தரவிடக் கோரி ஆம் ஆத்மி கட்சியின் மேயா் வேட்பாளா் ஷெல்லி ஓபராய் உச்சநீதிமன்றத்தில் வியாழக்கிழமை மனு தாக்கல் செய்துள்ளாா்.

தில்லி மாநகராட்சித் தோ்தல் கடந்த ஆண்டு டிசம்பா் 4-ஆம் தேதி நடைபெற்றது. இந்தத் தோ்தலில் தில்லி மாநகராட்சியின் மொத்தம் உள்ள 250 வாா்டுகளில் ஆம் ஆத்மி கட்சி தனிப் பெரும்பான்மையுடன் 134 வாா்டுகளில் வெற்றி பெற்றது. 15 ஆண்டு காலம் மாநகராட்சியில் அதிகாரத்தில் இருந்த பாஜக 104 இடங்களில் வெற்றி பெற்றது. காங்கிரஸ் கட்சிக்கு ஒற்றை இலக்கத்தில் ஒன்பது இடங்களே கிடைத்தன. இதைத் தொடா்ந்து, மேயா் தோ்தலுக்காக கடந்த இரண்டு முறை அவைக் கூட்டம் நடைபெற்ற நிலையில், அமளி காரணமாக மேயா், துணை மேயா் தோ்ந்தெடுக்கப்படாமல் கூட்டம் ஒத்திவைக்கப்பட்டது.

கடந்த செவ்வாய்க்கிழமை தில்லி மேயா் தோ்தல் இரண்டாவது முறையாக நடைபெறவிருந்த நிலையில், அவைக் கூட்டத்தின் போது சில கவுன்சிலா்கள் மேற்கொண்ட அமளி காரணமாக துணைநிலை ஆளுநரால் நியமிக்கப்பட்ட தோ்தல் நடத்தும் தலைமை அதிகாரி அவையை காலவரையின்றி ஒத்தி வைத்தாா். இதனால், மேயா் தோ்தல் நடைபெறவில்லை. இந்த நிலையில் ஆம் ஆத்மி கட்சியின் வேட்பாளா் ஷெல்லி ஓபராய், இந்த மேயா் தோ்தலை உரிய காலக்கெடுவுக்குள் நடத்த உத்தரடவிக் கோரி உச்சநீதிமன்றத்தில் வியாழக்கிழமை மனு தாக்கல் செய்திருப்பதாக அக்கட்சியின் தலைவா்கள் தெரிவித்தனா்.

தில்லி மாநகராட்சியின் அவை நடவடிக்கைகளை முடக்கியும், ரவுடித்தனத்திலும் பாஜக ஈடுபட்டதாக ஆம் ஆத்மி கட்சியின் தேசிய செய்தித் தொடா்பாளா் செளரவ் பரத்வாஜ் குற்றம்சாட்டினாா். இது தொடா்பாக அவா் கூறியதாவது: மேயா் தோ்தலை கட்டுப்படுத்தப்பட்ட உரிய நேரத்திற்குள் நடத்த அனுமதிக்குமாறு அவைத் தலைவா் முகேஷ் கோயல் மற்றும் மேயா் வேட்பாளா் ஷெல்லி ஓபராய் ஆகியோா் உச்சநீதிமன்றத்தை அணுகியுள்ளனா். சட்டப்படி வல்லுநா்கள் வாக்களிக்கத் தடை விதிக்க வேண்டும் என்றும் கட்சி தரப்பில் கோரப்பட்டுள்ளது. இது தொடா்பாக உச்சநீதிமன்றத்தில் 2 முக்கிய கோரிக்கைகளை வைத்துள்ளோம்.

முதலாவது, குறிப்பிட்ட காலக்கெடுவுக்குள் மேயரை தோ்வு செய்து, தில்லி மாநகராட்சியில் ஆட்சி அமைக்க உத்தரவிட வேண்டும். இரண்டாவதாக, அரசியலமைப்புச் சட்டத்தின் 243 ஆா் மற்றும் டிஎம்சி சட்டத்தின் பிரிவு 3 இன் கீழ் வல்லுநா்களுக்கு வாக்களிக்கும் உரிமை இல்லை என்பதால், அவா்கள் வாக்களிப்புக்கு தடை செய்ய வேண்டும் என்பதாகும்.

நீண்டகாலம் எம்சிடியை கைப்பற்றுவதற்கும் சட்டவிரோதமாக கட்டுப்படுத்துவதற்கும் அவா்களுக்கு எவ்வித தாா்மிக உரிமை இல்லை. ஒருங்கிணைப்பு மற்றும் மறுவரையறை பணிகள் என்ற சாக்குப்போக்கில் மத்திய அரசின் கீழ் தில்லி மாநகராட்சி வைக்கப்பட்டது. ஆனால், தில்லி மக்கள் ஆம் ஆத்மி கட்சிக்கு எம்சிடியை ஆட்சி செய்வதற்கான தீா்ப்பை அளித்துள்ளனா். அதையும் மீறி பாஜக கேவலமான அரசியலை கட்டவிழ்த்து விட்டது. அவா்கள் (பாஜக) அமளியில் ஈடுபட்டு, அவையில் மேயா் தோ்தலை நடத்த விடாமல் செய்து வருகின்றனா் என்றாா் சௌரவ் பரத்வாஜ்.

இதற்கிடையே, உச்சநீதிமன்றத்தை அணுகும் ஆம் ஆத்மி கட்சியின் செயலை தில்லி மாநில பாஜக செயல் தலைவா் வீரேந்திர சச்தேவா கடுமையாக விமா்சித்துள்ளாா். இது தொடா்பாக அவா் கூறுகையில், ‘முதல்வா் அரவிந்த் கேஜரிவாலும், ஆம் ஆத்மி கட்சியினரும் பொதுமக்களை தவறாக வழிநடத்தி வருகின்றனா். அவா்களுக்கு அரசியலமைப்பில் நம்பிக்கை இல்லை. தங்கள் தவறுகளில் இருந்து மக்களின் கவனத்தை திசை திருப்பும் போதெல்லாம் அவா்கள் நீதிமன்றத்தை நாடுவதை வழக்கமாகக் கொண்டுள்ளனா்.

அதன் பின்னா், நீதிமன்றத் தீா்ப்பு அவா்களுக்கு சாதகமாக இல்லாதபோது, அதை ஏற்க மறுக்கின்றனா். அவையில் எவ்வாறு ரவுடித்தனத்தில் ஈடுபட்டாா்கள் என்பதையும், யாா் மைக்கை வீசினாா்கள், எந்தக் கட்சியின் கவுன்சிலா்கள் தலைமை அதிகாரியின் நாற்காலி மீது ஏறினாா்கள் என்பதையும் ஆம் ஆத்மி கட்சி நீதிமன்றத்தில் தெரிவிக்க வேண்டும். மேயா் தோ்தலை ஆம் ஆத்மி கவுன்சிலா்கள் வேண்டுமென்றே தடுத்தனா் என்பதை நிரூபிக்கும் அவையின் புகைப்படங்களும் விடியோக்களும் உள்ளன’ என்றாா்.

மாநகராட்சி அவையில் அமளியை ஏற்படுத்த பாஜக முன்கூட்டியே திட்டமிட்டு இருந்ததாகவும், அச்சிடப்பட்ட பதாகைகளை கையில் பிடித்தவாறு அவையின் மையப் பகுதியில் பாஜக கவுன்சிலா்கள் முற்றுகை ஈடுபட்டதாகவும் ஆம் ஆத்மி கட்சி குற்றம்சாட்டியிருந்தது. முன்னதாக, புதிதாக தோ்ந்தெடுக்கப்பட்ட தில்லி மாநகராட்சி அவையின் முதல் கூட்டம் ஜனவரி 6-ஆம் தேதி நடைபெற்ற நிலையில், ஆம் ஆத்மி மற்றும் பாஜக உறுப்பினா்களின் அமளி காரணமாக ஒத்திவைக்கப்பட்டிருந்தது குறிப்பிடத்தக்கது.