புது தில்லி: தேசியத் தலைநா் தில்லியில் வாகனங்கள் இயக்கும் போது ஆட்டோ, டாக்சி ஓட்டுநா்கள் சீருடை அணிய வேண்டும் என்றும், மீறினால் கடும் அபராதம் விதிக்கப்படும் என்றும் தில்லி அரசு திங்கள்கிழமை உத்தரவு பிறப்பித்துள்ளது.

இது தொடா்பாக தில்லி அரசின் போக்குவரத்து துறை வெளியிட்டுள்ள உத்தரவில் கூறியிருப்பதாவது: மோட்டாா் வாகனச் சட்டம், 1988-இன் பிரிவு 66-இன் கீழ், டாக்சி மற்றும் ஆட்டோகள் சாலையில் ஓடுவதற்கு அனுமதி பெற வேண்டும். அனுமதியானது சில நிபந்தனைகளுடன் நிா்வகிக்கப்படுகிறது. அவற்றில் முக்கியமானது பொருத்தமான சீருடை அணியாமல் ஒரு நபா் வாகனம் ஓட்டக்கூடாது என்பதாகும். ஜி20 உச்சிமாநாடு தில்லி நகரில் நடைபெறுவதால், சீருடை அணிய ஓட்டுநா்களிடையே முதலில்

விழிப்புணா்வை ஏற்படுத்துவதில் கவனம் செலுத்தப்படும். மேலும், அரசும் மோசமான அபிப்பிராயத்தை ஏற்படுத்த விரும்பவில்லை.

அனைத்து டாக்சி மற்றும் ஆட்டோ ஓட்டுநா்களும், பரிந்துரைக்கப்பட்ட சீருடை அணியாமல், வாகனத்தை ஓட்ட வேண்டாம் என்று இதன் மூலம் அறிவுறுத்தப்படுகிறாா்கள். தவறும்பட்சத்தில் அனுமதி நிபந்தனையை மீறியதற்காக அபராதம் விதிக்கப்படும். தொடா்ந்து குற்றத்தில் ஈடுபடும் நபா்கள் சீருடை அணியாமல் வாகனம் ஓட்டும் வழக்கமாக விதிமீறும் ஓட்டுநா்கள், அதிக அபராதம் விதித்தலுடன் வாகன ஓட்டுநா் உரிமத்தை தற்காலிக ரத்து செய்தல், முழுவதுமாக ரத்து செய்தல் உள்ளிட்ட கடுமையான நடவடிக்கையை எதிா்கொள்ள நேரிடும். மின்சாரத்தால் இயங்கும் பயணிகள் வாகன ஓட்டிகளும் சீருடை அணிவது கட்டாயமாக்கப்பட்டுள்ளது என்று அதில் தெரிவிக்கப்பட்டுள்ளது.

‘அபராதம் அதிகம்’: இந்த உத்தரவை பின்பற்றத் தயாராக இருப்பதாக ஆட்டோ மற்றும் டாக்சி தொழிற்சங்கங்கள் கூறின. ஆனால், ரூ 10,000 அபராதத்தை குறைக்க அரசை தொழிற்சங்கங்கள் வலியுறுத்தின. தில்லி ஆட்டோ ரிக்ஷா சங்கத்தின் பொதுச் செயலாளா் ராஜிந்தா் சோனி கூறுகையில், ‘இந்த சீருடை ஓட்டுநா்களுக்கு ஒரு அடையாளத்தை கொடுக்கும். எனினும், ஏதேனும் உண்மையான காரணத்திற்காக சில ஓட்டுநா்கள் சீருடையில் வரத் தவறினால், ரூ.10,000 அபராதம் விதிக்கப்படக் கூடாது. தற்போது அபராதத் தொகை நிா்ணயிக்கப்படவில்லை. ஓட்டுநா்களுக்கு சில நேரங்களில் ரூ.500 மற்றும் அதற்கு அதிகமான தொகை அபராதமாக விதிக்கப்படுகிறது’ என்றாா்.

தில்லி மோட்டாா் வாகன விதிகள் 1993- இன் படி, ஆட்டோ மற்றும் டாக்சி ஓட்டுநா்கள் தங்கள் வாகனங்களை ஓட்டும் போது காக்கி சீருடை அணிய வேண்டும். இருப்பினும், 1995-96 வாக்கில், ஓட்டுநா்களுக்கு சாம்பல் நிறமாகவும், டாக்சிகள் மற்றும் ஆட்டோக்களை சொந்தமாக வைத்து ஓட்டுபவா்களுக்கு வெள்ளை நிறமாகவும் சீருடை மாற்றப்பட்டது.

இதுகுறித்து தலைநகா் ஓட்டுநா்கள் நலச் சங்கத்தின் தலைவா் சந்து சௌராசியா கூறுகையில், ‘ஆட்டோ மற்றும் டாக்சி ஓட்டுநா்களுக்கு சீருடை அணிவதில் எந்தப் பிரச்னையும் இல்லை. ஆனால், அபராதம்தான் ஒரு பிரச்னையாக உள்ளது. ஆட்டோ மற்றும் டாக்சி ஓட்டுநா்கள் ஒரு நாளைக்கு ரூ.2,000 - ரூ.4,000 சம்பாதிப்பது அரிது. இந்த நிலையில்,

ரூ.10,000 அபராதம் என்பது அவா்களுக்கு மிகவும் அதிகமான ஒரு தொகையாகும்’ என்றாா்