புதுதில்லி

பகத் சிங் பிறந்த நாளையொட்டி ரத்த தான இயக்கம்: முதல்வா் கேஜரிவால் தொடங்கிவைத்தாா்

29th Sep 2022 01:23 AM | நமது நிருபா்

ADVERTISEMENT

சுதந்திரப் போராட்ட வீரா் பகத் சிங்கின் பிறந்த நாளை முன்னிட்டு தில்லியில் ரத்த தான இயக்கத்தை முதல்வா் அரவிந்த் கேஜரிவால் புதன்கிழமை தொடங்கி வைத்தாா். அப்போது, ஆண்டுக்கு இருமுறை ரத்த தானம் செய்யுமாறு பொதுமக்களை அவா் கேட்டுக் கொண்டாா்.

இந்நிகழ்வின் போது அவா் பேசியதாவது: பொதுமக்களில் ஒவ்வொருவரும் வருடத்திற்கு இரண்டு முறை ரத்த தானம் செய்வதாக உறுதிமொழி எடுக்க வேண்டும். தன்னாா்வத்துடன் ரத்த தானம் செய்பவா்கள் குறைவாக இருப்பதால், பிரசார முறையில் ரத்த தானம் செய்யும் கலாசாரத்தை வளா்க்க வேண்டிய அவசியம் உள்ளது. நானும் ரத்த தானம் செய்ய விரும்புகிறேன். ஆனால், நான் நீரிழிவு நோயாளி என்பதால் ரத்த தானம் செய்ய முடியவில்லை. தில்லி நகரம் முழுவதும் 70 இடங்களில் முகாம்கள் அமைக்கப்பட்டு, மக்கள் ஆா்வத்துடன் ரத்த தானம் செய்துள்ளனா். அடுத்த ஆண்டு மேலும் பல முகாம்கள் அமைக்கப்படும்.

நாட்டில் உள்ள அனைவருக்கும் நல்ல கல்வி மற்றும் சுகாதாரம் வழங்கப்பட வேண்டும் என்பதும், விவசாயிகள் மற்றும் தொழிலாளா்கள் அவா்களின் உரிமையைப் பெறுவதும் சுதந்திரப் போராட்ட தியாகி பகத் சிங்கின் கனவாக இருந்தது. ஐந்தாண்டுகளுக்குள் 130 கோடி மக்களுக்கு கல்வி மற்றும் சுகாதார சேவைகள் மேம்படுத்தப்பட்டால் நாடு சிறந்த வளா்ச்சியை எட்டும். ரத்த தானம் செய்ய மக்கள் ஊக்குவிக்கும் வகையில் ஆண்டு முழுவதும் தில்ல அரசு பிரசாரம் மேற்கொள்ளும்.

வழக்கமான அடிப்படையில் சுமாா் 1,500-2000 மக்கள் ரத்த தானம் அளித்து வருகின்றனா். அவா்கள் பெரும்பாலும் ஒரு நோயாளிக்கு ரத்தம் அளிக்க வேண்டியவா்களாக உள்ளனா். மாபெரும் அளவில் ரத்த தான இயக்கத்தை நடத்துவதன் மூலம் தில்லியில் இதை கலாசாரத்தின் ஒரு பகுதியாக நம்மால் உருவாக்க முடியும். ஆரோக்கியமுள்ள நபா் மூன்று மாதங்களுக்கு ஒரு முறை ரத்தம் தானம் செய்ய முடியும்ம. எனினும், ஆண்டுக்கு குறைந்தபட்சம் இருமுறை ரத்த தானம் செய்வதை உறுதிமொழியாக எடுத்துக் கொள்ளுமாறு இந்த தருணத்தில் மக்களுக்கு வேண்டுகோள் விடுக்கிறேன் என்றாா் கேஜரிவால்.

ADVERTISEMENT

மெளலானா ஆசாத் மருத்துவக் கல்லூரியில் நடைபெற்ற இந்த நிகழ்ச்சியில் துணை முதல்வா் மனீஷ் சிசோடியா ரத்த தானம் செய்தாா். அப்போது அவா் கூறுகையில், ‘தில்லியில் ஆண்டுக்கு சுமாா் 5.5-6 லட்சம் யூனிட் ரத்தம் தேவை உள்ளது. தினசரி ரத்த தானம் செய்வோா் எண்ணிக்கை சுமாா் 2 ஆயிரமாக உள்ளது. இந்த நல்ல நோக்கத்திற்கு மேலும் பலா் முன்வர வேண்டிய தேவை உள்ளது. இதுபோன்று ரத்தம் தானம் செய்வது பகத் சிங்கிற்கு நாம் செலுத்தும் உண்மையான அஞ்சலியாக இருக்கும்’ என்றாா்.

ADVERTISEMENT
ADVERTISEMENT