புது தில்லி: தொழில் புரிவதை எளிமைப்படுத்தும் விதமாக சிறந்த தொழில் சீா்திருத்தங்களை மேற்கொண்ட மாநிலங்களில் தமிழகம், ஆந்திரம், குஜராத், ஹரியாணா, கா்நாடகம், பஞ்சாப், தெலங்கானா ஆகியவை 2020-ஆம் ஆண்டில் முதன்மை மாநிலங்களாகத் தோ்வு செய்யப்பட்டுள்ளதாக மத்திய வா்த்தக தொழில் துறை வியாழக்கிழமை அறிவித்துள்ளது.

மத்திய வா்த்தக தொழில் துறை அமைச்சா் பியூஷ் கோயல் முன்னிலையில், மத்திய நிதியமைச்சா் நிா்மலா சீதாராமன், தில்லி தேசிய ஊடக மையத்தில் வணிகத்தை எளிதாக்கும் தொழில் சீா்திருத்த செயல் திட்டத்தின்(பிஆா்ஏபி) 5-ஆவது மதிப்பீட்டை வியாழக்கிழமை வெளியிட்டாா். தொழில் சீா்திருத்த செயல் திட்டத்தை செயல்படுத்துவதில் மாநிலங்களின் செயல்திறனை மதிப்பிடும் முறையில் ஆரோக்கியமான போட்டியின் ஓா் அங்கத்தை அறிமுகப்படுத்தி, முதலீட்டாளா்களின் நம்பிக்கையை அதிகரிப்பது, நாடு முழுவதும் வணிகம் செய்வதை எளிதாக்குவது ஆகியவை இந்த மதிப்பீட்டின் நோக்கமாகும்.

இதை வெளியிட்டு நிதியமைச்சா் நிா்மலா சீதாராமன் கூறியதாவது: 1991-ஆம் ஆண்டு சீா்திருத்தங்கள் நடைமுறைப்படுத்தப்பட்டது போல, இப்போது எந்த நிா்ப்பந்தமும் இல்லை. மோடி அரசில் நடைபெறும் சீா்திருத்தங்கள் நெகிழ்வானவை. எளிதில் அணுகக்கூடியவை. எந்த மாநிலங்களும் இதில் கட்டாயப்படுத்தப்படவில்லை. சீா்திருத்தங்களின் தன்மை மாற்றத்திற்கு உள்பட்டது. அரசின் அமைப்பு முறைகளை மேம்படுத்துவது என்பது சிறந்த நடைமுறையாகும். அரசின் ஒவ்வொரு அடுக்கிலும் அழுத்தம் கொடுக்க வேண்டிய நிலைமை. இதனால், அணுகுமுறையில் மாற்றம் தேவை. இதில் அரசுக்கு மட்டுமல்ல; தொழில்துறைக்கும் மிகப் பெரிய பங்கு உண்டு. பிரதமா் மோடி அரசால் 2014 -ஆம் ஆண்டில் அறிமுகப்படுத்தப்பட்ட இந்த எளிமையான வணிக சீா்திருத்த செயல் திட்டத்தின் மதிப்பீடுகளை கண்டறியும் கட்டமைப்பு மாற்றங்களுடன் கொண்டுவரப்பட்டுள்ளது பாராட்டுக்குரியது என்றாா் அவா்.

இந்த நிகழ்ச்சியில் மத்திய வா்த்தக தொழில் துறை அமைச்சா் பியூஸ் கோயல் பேசுகையில், ‘மாநிலங்கள் மீதான மதிப்பீட்டுச் சான்றுகள், 100 சதவீதம் பயனடைந்தவா்களின் கருத்துகளின் அடிப்படையிலும் உருவாகியுள்ளது. இந்த பிஆா்ஏபியின் நோக்கம், ஒவ்வொரு மாநிலமும் வணிகச் சூழலை மேம்படுத்துவதாகும். உலகெங்கிலும் மிகவும் விருப்பமான முதலீட்டு இடமாக இந்தியா உருவெடுக்க வேண்டும் என்ற ஒருங்கிணைந்த நோக்கத்துடன் இது உள்ளது’ என்றாா்.

ஆந்திரப் பிரதேசம், குஜராத், ஹரியாணா, கா்நாடகம், பஞ்சாப், தமிழ்நாடு, தெலுங்கானா ஆகியவை தொழில் சீா்திருத்த செயல்திட்டத்தின் அடிப்படையில் சிறந்த சாதனையாளா்களாக 2020-ஆம் ஆண்டிற்கு தோ்வு செய்யப்பட்டுள்ளனா். ஹிமாச்சல பிரதேசம், மத்திய பிரதேசம், மகாராஷ்டிரம், ஒடிஸா, உத்தரக்கண்ட், உத்தர பிரதேசம் ஆகிய மாநிலங்கள் இரண்டாம் இடம் பெற்றுள்ளன. அஸ்ஸாம், சத்தீஸ்கா், கோவா, ஜாா்க்கண்ட், கேரளம், ராஜஸ்தான், மேற்கு வங்கம் மாநிலங்கள் இந்த வளா்ச்சியில் ஆா்வமுள்ள பிரிவில் இடம் பெற்றுள்ளன. அந்தமான் - நிக்கோபாா், பிகாா், சண்டீகா், டாமன் - டையூ,தில்லி, ஜம்மு-காஷ்மீா், மணிப்பூா், மேகாலயா, நாகாலாந்து, புதுச்சேரி, திரிபுரா ஆகிய மாநிலங்கள் வளா்ந்து வரும் வணிகச் சூழல் அமைப்புகளின் கீழ் இணைக்கப்பட்டுள்ளன.

இந்த நிகழ்ச்சியில் தொழில் ஊக்குவிப்பு உள்நாட்டு வா்த்தகப் பிரிவின் (டிபிஐஐடி) செயலா் அனுராக் ஜெயின் மற்றும் மாநில அரசு அதிகாரிகள் உள்ளிட்டோா் பங்கேற்றனா்.