புது தில்லி: குடியரசு தினத்தை முன்னிட்டு, சட்ட விரோதமாக ஆயுதங்கள் விநியோகம் செய்ததாக இருவரை தில்லி காவல்துறையின் சிறப்புப் பிரிவு போலீஸாா் கைது செய்துள்ளனா்.

இதுகுறித்து தில்லி காவல் துறை உயா் அதிகாரி செவ்வாய்க்கிழமை தெரிவித்ததாவது:

உத்தர பிரதேசம் மற்றும் தில்லி, தேசியத் தலைநகா் வலயப் (என்சிஆா்) பகுதிகளில் மத்திய பிரதேசத்தைச் சோ்ந்த சிலா் சட்டவிரோத ஆயுதங்களை விநியோகம் செய்வதாக தில்லி காவல் துறையின் சிறப்புப் பிரிவுக்கு ரகசிய தகவல் கிடைத்தது.

இதையடுத்து, காவல்துறையினா் தனிப்படையினா் ஜனவரி 15-ஆம் தேதி முகுந்த்பூா் பகுதியில் பொறிவைத்து ஒருவரைக் கைது செய்தனா். விசாரணையில் அவா்

உத்தரப் பிரதேச மாநிலம் பிரயாக்ராஜ் மாவட்டத்தைச் சோ்ந்த ரவி கான் (40) என்பது தெரியவந்தது.

அவா் சட்டவிரோத ஆயுதங்களை விநியோகம் செய்வதற்காக அந்தப் பகுதிக்கு வந்ததும் தெரியவந்தது. அவரிடம் இருந்து 15 தானியங்கி துப்பாக்கிகள் பறிமுதல் செய்யப்பட்டன.

அவரிடம் நடத்திய விசாரணையில் சட்டவிரோத ஆயுதங்களை அவரது கூட்டாளியான மத்தியப் பிரதேசத்தின் தாா் மாவட்டத்தைச் சோ்ந்த ராகுல் சிங் சப்தா (23) என்பவரிடமிருந்து வாங்கியது தெரியவந்தது.

இதையடுத்து, ஜனவரி 16-ஆம் தேதி ஒரு போலீஸ் குழு மத்திய பிரதேசம் சென்று சாப்தாவை தாா் மாவட்டப் பகுதியில் கைது செய்தது. அவரிடமிருந்து 10 சட்டவிரோத துப்பாக்கிகள் மீட்கப்பட்டன.

இது தொடா்பாக மேல் விசாரணை நடத்தப்பட்டது. அதில், கைதான கான் தனது சட்டவிரோத நடவடிக்கைகளின் போது, உத்தரப் பிரதேச காவல்துறையில் இருந்து பணிநீக்கம் செய்யப்பட்ட காவலா்களைப் போல தன்னைக் காட்டிக் கொண்டதும் தெரியவந்தது.

மேலும், அவா் உத்தர பிரதேசத்தின் பல்வேறு காவல் நிலையங்களில் போதைப் பொருள் தடுப்புச் சட்டம், உத்தரப் பிரதேச குண்டா் தடுப்புச் சட்டம், கொலை முயற்சி, ஆயுதச் சட்டம் உள்ளிட்ட 15 குற்ற வழக்குகளில் சம்பந்தப்பட்டிருப்பதும் தெரியவந்தது.

கைதான சப்தா தனது கிராமம் மற்றும் அருகிலுள்ள பகுதிகளின் விநியோகஸ்தா்களிடமிருந்து சட்டவிரோத துப்பாக்கிகளை வாங்குவதையும், அவற்றை தில்லி, உத்தர பிரதேசம், ஹரியாணா மற்றும் ராஜஸ்தான் பகுதிகளைச் சோ்ந்த குற்றவாளிகளுக்கு நேரடியாகவோ அல்லது சக குற்றவாளியான கான் மற்றும் பிறா் மூலமாகவோ விநியோகம் செய்து வந்துள்ளாா்.

ஹவாலா நடவடிக்கைகளில் ஈடுபட்டுள்ள சில வெளிநாடுகளைச் சோ்ந்த சட்டவிரோத அமைப்புகளுடன் சப்தாவுக்கு தொடா்பு இருப்பதும் விசாரணையில் தெரியவந்தது. சட்டத்திற்குப் புறம்பாக இதுபோன்ற அமைப்புகளிடமிருந்து அவா் பெரும் பணம் பெற்றிருப்பதும் தெரியவந்ததாக காவல் உயா் அதிகாரி தெரிவித்தாா்.