புதுதில்லி

29 குழந்தைகளுக்கு பிரதமா் விருது

25th Jan 2022 12:00 AM | நமது சிறப்பு நிருபா்

ADVERTISEMENT

மத்திய அரசின் துறைகளின் கொள்கைகளும், முன் முயற்சிகளும் இளைஞா்களை மையப்படுத்தியே உள்ளதாக பிரதமா் நரேந்திரமோடி திங்கள்கிழமை தெரிவித்தாா்.

குழந்தைகளும் இளைஞா்களும் உள்ளூா் பொருள்களை ஆதரிக்கும் தூதா்களாக இருக்க வேண்டும் என்றும், தற்சாா்பு இந்தியா இயக்கத்திற்கு இளைஞா்கள் தலைமை தாங்குமாறும் பிரதமா் மோடி அழைப்பு விடுத்தாா்.

2021, 2022 ஆம் ஆண்டுகளுக்கான பிரதமரின் தேசிய பால புரஸ்காா் விருதுகள் மின் எண்மம் (டிஜிட்டல் சான்றிதழ்கள்) முறையில் நாடு முழுவதும் உள்ள 29 குழந்தைகளுக்கு வழங்கப்பட்டன. பிளாக்செயின் எனப்படும் இணைய வழி ஆவண பரிமாற்றத் தொழில்நுட்பத்தின் கீழ் முதன் முறையாக பிரதமா் சான்றிதழ்களை வழங்கினாா். காணொலி வழியாக நடைபெற்ற இந்த நிகழ்ச்சியில் தேசிய பால புரஸ்காா் விருதுகளை வழங்கி பிரதமா் நரேந்திர மோடி பேசினாா்.

அப்போது பிரதமா் கூறியதாவது:

ADVERTISEMENT

மத்திய அரசின் துறையின் கொள்கைகளும், முன்முயற்சிகளும் இளைஞா்களை மையப்படுத்தியே உள்ளன. ஸ்டாா்ட்டப் இந்தியா (தொழில் முனைவோா்), ஸ்டாண்ட் அப் இந்தியா (எழுந்து நில் இந்தியா), எண்மம் இந்தியா(டிஜிட்டல் இந்தியா), இந்தியாவில் உற்பத்தி(மேக் இன் இந்தியா) ஆகியவைகள் மூலம் தற்சாா்பு இந்தியா இயக்கமாக நவீன கட்டமைப்புகள் உருவாக்கும் முன்முயற்சிகளில் இளைஞா்கள் பங்கு பெற்றனா்.

இந்த புதிய யுகத்தில் இந்திய இளைஞா்கள் வேகமாக இந்தியாவிலும், வெளிநாடுகளிலும் தலைமை தாங்குவது மிகவும் பொருத்தமாக உள்ளது. புதிய கண்டுபிடிப்பு மற்றும் புதிய தொழில்கள் துறையில் இந்தியாவின் சக்தி அதிகரித்து வருகிறது.

உலகின் மிகப் பெரிய நிறுவனங்களுக்கு இந்தியா இளம் தலைமை நிா்வாகிகள் பொறுப்பேற்றிருப்பதை நாடு பெருமிதம் கொள்கிறது. உலகில் புதிய தொழில்களில் இந்தியா இளைஞா்கள் சிறந்து விளங்குகின்றனா். புதிய கண்டுபிடிப்புகளை உருவாக்கி நாட்டை முன்னேற்றப் பாதையில் கொண்டு செல்லும் இந்தியா இளைஞா்கள் உள்ளூா் பொருள்களை ஆதரிக்கும் தூதா்களாகவும், தற்சாா்பு இந்தியா இயக்கத்திற்கு தலைமை தாங்கவும் முன் வரவேண்டும்.

சுதந்திரத்தின் அமுதப் பெருவிழா (75-வது ஆண்டு)கொண்டாடும் இந்த தருணத்தில் இந்த விருதுகள் வழங்கப்படுவது மிகவும் சிறப்பு. கடந்த காலத்திலிருந்து வலிமையைப் பெற்று 100 -ஆவது ஆண்டை நெருங்கும் அமிா்த காலமான வரும் 25 ஆண்டுகளில் மகத்தான விளைவுகளை உருவாக்க அா்ப்பணிப்பதற்கான தருணம் இது.

இன்று (திங்கள்கிழமை) தேசிய பெண் குழந்தைகள் தினம். விடுதலைப் போராட்ட வரலாற்றில் பீா்பால கனக்லதா பருவா(அஸ்ஸாம்), குதிராம் போஸ் (மேற்கு வங்கம்), ராணி கைடிநீலு (மணிப்பூா்) ஆகியோரின் பங்களிப்பு நினைவு கூரத்தக்கது. இளம் வயதிலேயே இந்த வீரா்கள் நாட்டின் சுதந்திரத்திற்கான இயக்கத்தில் ஈடுபட்டு அதற்காக தங்களை அா்ப்பணித்துக் கொண்டாா்கள்.

கடந்த ஆண்டு தீபாவளிப் பண்டிகையின்போது சுதந்திரத்திற்குப் பிந்தைய போரில் சிறாா் வீரா்களாக பங்களிப்பு செய்த பல்தேவ் சிங், பசந்த் சிங் ஆகியோரை ஜம்மு-காஷ்மீரின் நவ்ஷேரா பகுதியில் சந்தித்தேன். தங்களின் வாழ்க்கையைப் பற்றி கவலைப்படாமல் அந்த இளம் வயது ராணுவத்திற்கு அவா்கள் உதவி செய்தனா்.

குரு கோவிந்த் சிங்கின் புதல்வா்கள் இளைய வயதில் செய்த வீரமும் தியாகங்களும் மற்றொரு உதாரணங்கள். இந்தியாவின் நாகரிகம், கலாச்சாரம், ஆன்மிகம், சமயத்திற்கு அவா்களது தியாகம் ஒப்பில்லாதது. இவைகளை இளைஞா்கள் அறிந்து கொள்ளவேண்டும்.

முன்பு பல துறைகளில் புதல்விகள் அனுமதிக்கப்படுவதில்லை. தற்போது நாட்டில் அனுமதிக்கப்படாத துறைகளிலும் கூட இன்று புதல்விகள் சிறப்பாக பணியாற்றி சாதிக்கின்றனா். புதிய கண்டுபிடிப்பிலிருந்து பின்வாங்காத புதிய இந்தியா இது. துணிவும், உறுதியும் இன்றைய இந்தியாவின் அடையாளங்கள்.

வெறும் 20 நாள்களில் 40 மில்லியனுக்கும் அதிகமான இளைஞா்கள் கரோனா தடுப்பூசி செலுத்திக் கொண்டுள்ளனா் என்றாா் பிரதமா்.

முன்னதாக, பிரதமரின் தேசிய பால புரஸ்காா் விருது பெற்ற குழந்தைகளுடன் பிரதமா் கலந்துரையாடினாா்.

மத்தியப்பிரதேசம் இந்தூரைச் சோ்ந்த சிறுவன் அவி சா்மா முழு ஊடங்கின்போது ராமாயணத்தின் சிறந்த அம்சங்களை ஒளிபரப்பியது குறித்து கலந்துரையாடிய பிரதமா், அவரது படைப்பில் சில பாடல் வரிகளையும் பாடினாா்.

மேலும் செல்வி உமாபாரதி குழந்தையாக இருந்தபோது ஆழமான ஆன்மிகத்தையும், அறிவுத்திறனையும் வெளிப்படுத்தியதைப் பிரதமா் எடுத்துரைத்தாா்.

கா்நாடகாவைச் சோ்ந்த செல்வி ரிமோனா எவடே பெரிரா(இந்திய நடனம்), திரிபுராவைச் சோ்ந்த புகாபி சக்கரவா்த்தியின் புதிய கண்டுபிடிப்புகள், செயலியை உருவாக்கி சாதனைப் படைத்த பஞ்சாபை சோ்ந்த சிறுவன் மீதான்ஷ் குமாா் குப்தா உள்ளிட்ட பல விருதாளா்களிடம் பிரதமா் விவாதித்தாா். தொழில் முனைவோரை உருவாக்குவதற்கான அரசியல் முயற்சிகள் பயன் தந்துள்ளதையும் வேலை தேடுவோா் என்பதற்கு மாறாக வேலை தருவோராக மாறியிருப்பதையும் மீதான்ஷ் போன்ற இளையோா்களிடம் தான் காண்பதாக பிரதமா் இந்த நிகழ்ச்சியில் குறிப்பிட்டாா்.

விருது பெற்ற 29 சிறாா்களில் தமிழகத்தை சோ்ந்த இரு குழந்தைகளும் பிரதமரின் தேசிய பால புரஸ்காா் விருதுகள் பெற்றனா்.

விருதுநகரைச் சோ்ந்த எட்டு வயது சிறுமி என்.சி. விஷாலினி வெள்ளப் பேரிடா்களின்போது நீரில் மூழ்குவதைத் தடுக்கும் ஒரு தானியங்கி பல் செயல்பாட்டு உயிா் மீட்பு வெள்ள வீடு ஒன்றை கண்டுபிடித்ததற்காக கிடைத்துள்ளது.

செங்கல்பட்டு மாவட்டத்தை சோ்ந்த 14- வயது அஸ்வதா பிஜு இளம் பழங்கால ஆராய்ச்சியாளராகி, முதுகெலும்பிகள் (யங்ழ்ற்ங்க்ஷழ்ஹற்ங்) அல்லது முள்ளந் தண்டுளிகள் சிற்றினங்கள் புதைபடிவ (தொல்லுயிா் எச்சம் ) மாதிரிகளை சேகரித்து பாதுகாப்பதோடு கருத்தரங்குகள், காட்சிகளை நடத்தி விழிப்புணா்வு ஏற்படுத்தியதற்காக பிரதமரின் விருதை பெற்றாா்.

புதுமை, சமூக சேவை, கல்வித்திறன் , விளையாட்டு, கலை மற்றும் கலாச்சாரம் (6), வீரம் (3) ஆகிய பிரிவுகளில் 29 விருதுகள் பெற்ற நபா்களில் 14 சிறுமிகள் உள்ளனா். இவா்களுக்கு சான்றிதழுடன் ரூ.1 லட்சம் ரொக்கமும் இந்த சிறாா்களுக்கு பரிசாக வழங்கப்பட்டது.

ADVERTISEMENT

MORE FROM THE SECTION

ADVERTISEMENT