புதுதில்லி

ராஜன் பாபு மருத்துவமனையின் பெயருக்குகளங்கம் ஏற்படுத்த தில்லி அரசு முயற்சி: என்டிஎம்சி மேயா் குற்றச்சாட்டு

1st Jan 2022 10:59 PM | நமது நிருபா்

ADVERTISEMENT

கொவைட் தொற்று பரவலுக்கு எதிரான போராட்டத்தின் போது உதவியில் ஈடுபட்ட ராஜன் பாபு காசநோய் மருத்துவமனையின் பெயருக்குக் களங்கம் ஏற்படுத்த தில்லி அரசு முயற்சி செய்வதாக வடக்கு தில்லி மேயா் ராஜா இக்பால் சிங் சனிக்கிழமை குற்றம்சாட்டினாா்.

ஆம் ஆத்மி எம்எல்ஏ அதிஷி சமீபத்தில் வடக்கு தில்லி மாநகராட்சியின் மூலம் நடத்தப்படும் ராஜன் பாபு காசநோய் மருத்துவமனைக்கு திடீரென நேரில் சென்றாா். மேலும், இந்த மருத்துவமனைக் கட்டடம் ‘ஆபத்தானது’ என்று மாநகராட்சி அறிவித்த போதும், வளாகத்தில் உள்ள பாழடைந்த கட்டடத் தொகுதியில் நோயாளிகளுக்கு சிகிச்சை அளிக்கப்படுவதாக கூறப்படும் நிலையில், அதை ஆம் ஆத்மி கட்சியினா் சமூக ஊடகங்களில் நேரலையில் ஒளிபரப்பினா். இதையடுத்து, இந்த விவகாரம் குறித்து விசாரிக்க தில்லி நகா்ப்புற மேம்பாட்டுத் துறை அமைச்சா் சத்யேந்தா் ஜெயின் உத்தரவிட்டிருந்தாா்.

அந்த உத்தரவில் கூறப்பட்டுள்ளதாவது: வடக்கு தில்லி மாநகராட்சி மூலம் நடத்தப்பட்டு வரும் ராஜன்பாபு காசநோய் மருத்துவமனைக் கட்டடம் மோசமான நிலையில் இருப்பது தொடா்பாக எனது கவனத்திற்கு கொண்டு வரப்பட்டுள்ளது. இந்த கட்டடம் வாழ்வதற்கும் மனிதா்கள் இருப்பதற்கும் பாதுகாப்பற்ாக இருப்பதாக மாநகராட்சிதான் அறிவித்திருக்கிறது. அப்படி இருந்த போதிலும், அந்த மருத்துவமனை செயல்பட்டு வருகிறது. நோயாளிகள், உதவியாளா்கள், பணியாளா்கள், குடிமக்கள் ஆகியோரின் உயிா் ஆபத்தில் உள்ளது. இந்த கட்டடம் எந்த நேரத்திலும் இடிந்து விழலாம் என்று தோன்றுகிறது. ஏராளமான உயிா்கள் ஆபத்தில் உள்ளன. இதனால், இந்த விவகாரம் தொடா்பாக எடுக்கப்பட்ட நடவடிக்கை தொடா்பான அறிக்கை அளிக்கப்பட வேண்டும். மேற்கண்ட சூழலை கருத்தில் கொள்ளும் போது, மேற்கண்ட மருத்துவமனையில் பணியாற்றி வரும் மருத்துவா்கள், துணை மருத்துவ பணியாளா்கள் மற்றும் மனித உயிா்கள் பாதுகாப்புக்காக அந்தக் கட்டடத்தை சீலிடுவது மற்றும் காலி செய்வது தொடா்பாக உடனடியாக விசாரணை நடத்தப்படலாம் என்று உத்தரவில் தெரிவிக்கப்பட்டுள்ளது.

மேயா் பதிலடி: இதற்குப் பதிலளிக்கும் விதமாக வடக்கு தில்லி மேயா் ராஜா இக்பால் சிங் செய்தியாளா்களிடம் சனிக்கிழமை கூறியதாவது: ராஜன் பாபு மருத்துவமனையின் ஒரு பகுதியில் ஏற்பட்ட பாதிப்பை தில்லி அரசு பெரிதுபடுத்தி அரசியல் செய்வது ஒருதலைப்பட்சமானது. மேலும், இந்த விவகாரத்தில் மருத்துவமனை நிா்வாகத்திடமோ அல்லது மாநகராட்சி ஆணையரிடமோ அறிக்கை கேட்காமல் கட்டடத்தை சீலிடுவது அல்லது காலி செய்வது தொடா்பாக நேரிடயாக உத்தரவிடுவதன் மூலம் சட்ட அமைப்பின் விதிகளை அமைச்சா் மீறியுள்ளாா். இரு தினங்களுக்கு முன்பு தில்லியின் ஆளும்கட்சித் தலைவா் ஒருவா் இந்த மருத்துவமனைக்குள் கேமராக்களுடன் சென்று அந்த கட்டடத்தின் பாழடைந்த ஒரு சிறிய பகுதியை பெரிதுபடுத்தி மருத்துவமனையின் பெயருக்கு களங்கம் ஏற்படுத்த முயன்றாா். அதன் பிறகு, அந்தக் கட்சியின் தலைவா் அந்த ஒட்டுமொத்த மருத்துவமனையும் மனிதா்கள் இருப்பதற்கு தகுதியில்லாதது என்று பத்திரிகையாளா்களிடம் தெரிவித்தாா். இது முற்றிலும் பொய்யாகும்.

ADVERTISEMENT

காசநோய் உள்பட மாா்பு தொடா்புடைய நோய்களுக்கு சிறப்பான சிகிச்சை அளிக்கும் 700 படுக்கைகளை கொண்ட இந்த மருத்துவமனை கரோனா 2-ஆவது அலையின் போது, தில்லி அரசு ஆக்சிஜன் படுக்கைகளை ஏற்பாடு செய்வதில் தோல்வியடைந்திருந்தது. அந்தச் சமயத்தில் ஒரு அவசர நடவடிக்கையாக ராஜன் பாபு மருத்துவமனை 100 ஆக்சிஜன் படுக்கைகளை வழங்கியது. இந்த நிலையில், ஆபத்தில் உதவிய மருத்துவமனையின் பெயருக்கு களங்கம் ஏற்படுத்த தில்லி அரசு முயல்வது அதிா்ச்சி அளிப்பதாக உள்ளது. தில்லி மாநகராட்சி சட்டம்-2012-இன்படி எந்த ஒரு கட்டடமும் மனிதா்கள் வாழ தகுதியில்லாத ஆபத்தான நிலையில் இருப்பதாக அறிவிப்பதற்கும், சா்வே செய்வதற்கும் மாநகராட்சிகளுக்கு மட்டுமே அதிகாரம் அளிக்கப்பட்டுள்ளது. இந்த விவகாரத்தில் சம்பந்தப்பட்ட கட்டடத்தின் ஒரு பகுதி வாழ்வதற்குத் தகுதியில்லாதது என்று அறிவிக்கும் உத்தரவை ஏற்கெனவே வடக்கு தில்லி மாநகராட்சி பிறப்பித்திருந்தது என்றாா் அவா்.

ஐஐடி வல்லுநா்கள் குழு ஆய்வு செய்யும்

என்டிஎம்சி ராஜன் பாபு காசநோய் மருத்துவமனையில் உள்ள ஒரு கட்டடத் தொகுதியின் கட்டுமானப் பாதுகாப்பை மதிப்பிடுவதற்கு ரூா்க்கியில் உள்ள ஐஐடி நிபுணா்கள் நியமிக்கப்பட்டுள்ளதாக பாஜக தலைமையிலான வடக்கு தில்லி மாநகராட்சியின் நிலைக் குழுத் தலைவா் ஜோகி ராம் ஜெயின் தெரிவித்தாா்.

இது குறித்து அவா் கூறுகையில், ‘வரவிருக்கும் உள்ளாட்சித் தோ்தல் காரணமாக இந்த விவகாரத்தில் ஆம் ஆத்மி அரசியலில் ஈடுபட்டு வருகிறது. ராஜன் பாபு மருத்துவமனையின் பல மாடி கட்டடத் தொகுதியின் ‘முகப்பு மற்றும் இரண்டு வாா்டுகள் மட்டுமே’ சேதமடைந்த நிலையில் இருந்தன. ஆம் ஆத்மி கட்சியினா் கூறியது போல முழு கட்டடமும் பாழடைந்த நிலையில் இல்லை‘ என்றாா்.

கட்டுமானத்தின் முன்புறம் நிறுவப்பட்ட எச்சரிக்கை பலகைகள் குறித்து கேட்ட போது அவா் கூறியதாவது: முன்புறம் எச்சரிக்கை பலகைகள் வைக்கப்பட்டுள்ளன. ஆனால், ஒரு

கட்டடம் முழுமையாகவோ அல்லது பகுதியாகவோ சேதமடைந்தாலும் பொதுவாக கட்டடம் சேதமடைந்திருப்பதாக கூறப்படுவது வழக்கம். ஆனால், இந்த விவகாரத்தை அதிஷி ஊதி பெரிதுபடுத்திவிட்டாா். அதிஷி எம்எல்ஏ தனது நேரலை விடியோவில் நோயாளிகள் இருக்கும் வாா்டுகளை சுட்டிக்காட்டினாா். அந்த வாா்டுகள் பாழடைந்த நிலையில் இருந்ததாக குறிப்பிட்டிருந்தாா். வாா்டு எண் 9 மற்றும் வாா்டு எண் 14-இல் பாதி மட்டுமே சேதமடைந்திருந்தது. அவையும் மூடப்பட்டுள்ளன.

இந்தக் கட்டுமானத் தொகுதியின் கட்டமைப்புப் பாதுகாப்பை மதிப்பிடுவதற்கு முன்பே நிபுணா்கள் குழு நியமிக்கப்பட்டுவிட்டது. இதனால், கட்டடத்தின் பாதுகாப்பு மதிப்பீட்டை மேற்கொள்ளுமாறு ரூா்க்கி ஐஐடி குழுவுக்கு நினைவூட்டல் கடிதம் அனுப்பியுள்ளோம். ராஜன் பாபு காசநோய் மருத்துவமனையின் பிரதான கட்டடம் ஆங்கிலேயா் காலத்தில் கட்டப்பட்ட பாரம்பரிய கட்டடமாகும். 60 ஏக்கா் பரப்பளவு கொண்ட இந்த வளாகத்தில் பாழடைந்த கட்டடத் தொகுதி தனியாக அமைந்துள்ளது என்றாா் அவா்.

 

ADVERTISEMENT

MORE FROM THE SECTION

ADVERTISEMENT