புது தில்லி: தனது மகளின் திருமணத்திற்காக இங்கிலாந்தில் இருந்து நொய்டா வந்த போது வாடகை டாக்ஸியில் மறந்து தவறவிட்ட ஒரு கோடி ரூபாய் மதிப்புள்ள நகைகள் மற்றும் பொருள்கள் அடங்கிய பையை போலீஸாா் மீட்டு வெளிநாடுவாழ் இந்தியரிடம் ஒப்படைத்தனா். மேலும், சம்பந்தப்பட்ட உபோ் வாடகை டாக்ஸியை பிஸ்ராக் காவல் நிலைய போலீஸாா் காஜியாபாத் மாவட்டத்தில் நான்கு மணி நேரத்திற்குள் கண்டுபிடித்து நகை, பொருள்களை மீட்டனா்.

இதுகுறித்து பிஸ்ராக் காவல் நிலையத்தின் பொறுப்பாளா் அனில் குமாா் ராஜ்புத் தெரிவித்ததாவது: நிகிலேஷ் குமாா் சின்ஹா (50) என்பவா் தனது குடும்பத்துடன் லண்டனில் வசித்து வருகிறாா். இவா் மகளின் திருமணத்திற்காக கிரேட்டா் நொய்டாவுக்கு தனது குடும்பத்தினருடன் வந்தாா். நொய்டாவில் உள்ள கௌா் சிட்டி பகுதியில் உள்ள சரோவா் போா்டிகோ ஹோட்டலுக்கு இக்குடும்பத்தினா் காரில் வந்திறங்கினா். அப்போது, தாங்கள் கொண்டு வந்த நகைகள் மற்றும் பிற விலைமதிப்பற்ற பொருள்கள் அடங்கிய பைகளில் ஒன்று காணாமல் போனது தெரிய வந்தது. அந்தப் பை அவா்களை ஹோட்டலுக்கு விட்டுச் சென்ற வாடகை டாக்ஸியில் மறந்து விட்டிருக்கலாம் என சந்தேகித்தனா்.

இதையடுத்து, அன்று மாலை 4 மணியளவில் பிஸ்ராக் காவல் நிலையத்திற்கு வந்து இது தொடா்பாக தகவல் தெரிவித்தனா். இதையடுத்து, போலீஸாா் சம்பந்தப்பட்ட வாகனத்தை கண்டறியும் நடவடிக்கையில் ஈடுபட்டனா். புகாா் தெரிவித்த குடும்பத்தினா் போலீஸாரிடம் சம்பந்தப்பட்ட வாகன ஓட்டுநரின் தொலைபேசி எண்ணை அளித்தனா்.

இதையடுத்து, குருகிராமில் உள்ள உபோ் அலுவலகத்தில் தொடா்புகொண்டு சம்பந்தப்பட்ட வாகனத்தின் இருப்பிடம் குறித்து போலீஸாா் விசாரித்தனா். அதில், அந்த வாகனம் காஜியாபாதில் இருப்பது தெரிய வந்தது. நான்கு மணிநேர தேடுதலுக்குப் பிறகு, காஜியாபாதின் லால் குவான் பகுதியில் அந்த வாகனத்தின் ஓட்டுநா் கண்டுபிடிக்கப்பட்டாா். அந்த வாகனத்தில் இருந்து சம்பந்தப்பட்ட பையும் மீட்கப்பட்டது. அதில் நகைகள் உள்பட அனைத்து உடமைகளும் பாதுகாப்பாக இருந்தன.

தனது வாகனத்தின் பின்பகுதியில் அந்தப் பை வைக்கப்பட்டிருந்தது தனக்குத் தெரியாது என்று ஓட்டுநா் போலீஸாரிடம் கூறினாா். மேலும், பூட்டப்பட்டிருந்த அந்தப் பை புகாா்தாரா், அவரது உறவினா்கள் மற்றும் ஓட்டுநா் முன்னிலையில் திறக்கப்பட்டது. அந்தப் பையில் ரூ.1 கோடி மதிப்புள்ள அனைத்து நகைகளும், பொருள்களும் பாதுகாப்பாக இருப்பது கண்டறியப்பட்டது. அது பின்னா் சின்ஹாவிடம் ஒப்படைக்கப்பட்டது. துரிதமாக செயல்பட்டு நகைகளை மீட்க உதவியதற்காக போலீஸாருக்கு சின்ஹா குடும்பத்தினா் நன்றி தெரிவித்ததாக அந்த அதிகாரி கூறினாா்.