மூன்று மத்திய அமைச்சா்கள் மற்றும் தில்லி துணைநிலை ஆளுநா் வினய் குமாா் சக்சேனா ஆகியோா் 10,000 புது தில்லி முனிசிபல் கவுன்சில் பள்ளி மாணவா்களுடன் அதிகாலை நடைப்பயணத்தில் பங்கேற்று, ’ இல்லம் தோறும் தேசியக் கோடி (ஹா் கா் திரங்கா)’ பிரசாரத்தை ஞாயிற்றுக்கிழமை மேற்கொண்டனா்.

பள்ளிக் குழந்தைகளுடான காலை நடைபயணம் (பிரபாத் பேரி) ஜன்பத் ரவுண்டானாவில் இருந்து தொடங்கி, ‘இந்தியா கேட்‘ தேசிய போா் நினைவுச் சின்னத்தில் முடிவடைந்தது.

இந்தியாவின் 75 - ஆம் ஆண்டு சுதந்திரத்தைக் குறிக்கும் வகையில் ‘சுதந்திரத்தின் அமுதப்பெருவிழாவின் ( அம்ருத் மஹோத்ஸவக் கொண்டாட்டம் )’ கீழ் இந்த ஹா் கா் திரங்கா பிரசாரம் மேற்கொள்ளப்பட்டது.

இந்த நிகழ்ச்சியில் மத்திய அமைச்சா்கள் பியூஷ் கோயல், ஸ்மிருதி இரானி, மீனாட்சி லேகி ஆகியோா் முன்னிலை வகித்து கலந்து கொண்டனா்.

தில்லி துணைநிலை ஆளுநா் வினய் குமாா் சக்சேனா, புது தில்லி முனிசிபல் கவுன்சில்(என்டிஎம்சி) தலைவா் அஷ்வனி குமாா், என்டிஎம்சி உறுப்பினா்கள் குல்ஜீத் சிங் சாஹல், விசாகா சைலானி ஆகியோரும் அணிவகுப்பில் பங்கேற்றனா்.

இல்லம்தோறும் தேசியக் கொடி (ஹா் கா் திரங்கா )

பிரசாரத்தின் ஒரு பகுதியாக 10,000 பள்ளி மாணவா்களின் காலை நடைபயணத்தில் மத்திய அமைச்சா்கள் பியூஷ் கோயல், ஸ்மிருதி இரானி, மீனாட்சி லேகி ஆகியோா் இணைய மாணவா்கள் உற்சாகம் அடைந்தனா்.

இது குறித்து துணை நிலை ஆளுநா் வினய் குமாா், ‘குழந்தைகளின் உற்சாகம், ஆற்றல் மற்றும் திரங்கா மீதான அவா்களின் பற்றுதல் ஆகியவை சாதாரணமாகவே தொற்றியிருந்தது. உண்மையில் ஆவேசம் இந்தியாதான்! அம்ருத் மஹோத்ஸவக் கொண்டாட்டம் ,‘ என ட்விட்டரில் கருத்து தெரிவித்துள்ளாா்.

மேலும் மத்திய அமைச்சா்கள் மற்றும் பிற அதிகாரிகளுடன் குழந்தைகள் தேசியக் கொடியை ஏந்தியபடி சென்ற படங்களையும் துணைநிலை ஆளுநா் ட்விட்டரில் வெளியிட்டாா்.

‘குழந்தைகள் ஜன்பத்திலிருந்து இந்தியா கேட்டில் உள்ள போா் நினைவுச் சின்னத்திற்கு நடந்து செல்லும்போது,எல்லையில்லா ஆற்றல், தொற்றும் உற்சாகம், கைகளில் மூவா்ணமும், இதயத்தில் இந்தியாவும்!’ என துணை நிலை ஆளுநா் மற்றொரு

ட்விட்டரில் வா்ணித்திருந்தாா்.

நடைபயணம் தொடக்கத்திற்கு முன்னா் துணை நிலை ஆளுநா் சக்சேனா பேசியதாவது:, ’ஹா் கா் திரங்கா பிரசாரத்தை’ பாா்க்கும்போது இந்தியாவின் பிரகாசமான எதிா்காலத்தை உங்கள் வழியாக (குழந்தைகள்) பாா்க்க முடிகிறது.

‘ அம்ருத் மஹோத்ஸவக் கொண்டாட்டம் ’ என்பது நமது கலாசாரம், பாரம்பரியம் மற்றும் சுதந்திர இந்தியாவின் 75 ஆண்டுகளில் பெற்ற சாதனைகளின் விழாவாகும்.

இல்லம்தோறும் தேசியக் கொடி என்பது அம்ருத் மஹோத்ஸவ ஒரு பகுதியாகும். இதை குடிமக்கள் தங்கள் வீட்டின் மேல் ஏற்றி கொண்டாடுவாா்கள். மூவா்ணக்கொடி என்பது நமது போராட்ட சுதந்திரம் மற்றும் நமது தேசத்தின் எதிா்காலம். தியாகத்தை வழங்கிய நமது சுதந்திர போராட்ட வீரா்களின் தியாகத்தின் சின்னம்‘ என்றாா் துணை நிலை ஆளுநா் சக்சேனா.