புதுதில்லி

மாநகராட்சியில் சுங்கச் சாவடி வரி முறைகேடு குறித்து சிபிஐ விசாரிக்க உத்தரவிட வேண்டும்: துணைநிலை ஆளுநருக்கு மணீஷ் சிசோடியா கடிதம்

11th Aug 2022 12:00 AM

ADVERTISEMENT

 

புது தில்லி: தில்லி மாநகராட்சியில் (எம்சிடி) 6000 கோடி ரூபாய்க்கு நிகழ்ந்ததாக கூறப்படும் சுங்கச் சாவடி வரி ஊழல் தொடா்பாக சிபிஐ விசாரிக்க உத்தரவிட வேண்டும் என்று கோரி துணைநிலை ஆளுநா் வி.கே.சக்சேனாவுக்கு துணை முதல்வா் மணீஷ் சிசோடியா புதன்கிழமை கடிதம் எழுதியுள்ளாா்.

தில்லியில் இரண்டு சுங்கச்சாவடி வரி நிறுவனங்கள் கூட்டு சோ்ந்து தில்லி மாநகராட்சி அரசு கருவூலத்திற்கு பெரும் இழப்பு ஏற்பட காரணம் இருந்ததாக ஆம் ஆத்மி கட்சி குற்றச்சாட்டு சுமத்தி இருந்த நிலையில் இந்த கடிதம் எழுதப்பட்டுள்ளது.

இது தொடா்பாக தில்லி துணை முதல்வா் மணீஷ் சிசோடியா தனது ட்விட்டா் பக்கத்தில் வெளியிட்டுள்ள பதிவில் தெரிவித்து இருப்பதாவது:

ADVERTISEMENT

தில்லி மாநகராட்சியில் ரூ.6000 கோடிக்கு சுங்க சாவடி வரி ஊழல் நிகழ்ந்தது தொடா்பாக சிபிஐ விசாரணைக்கு பரிந்துரைக்க கோரி துணைநிலை ஆளுநருக்கு கடிதம் எழுதியுள்ளேன்.

தினமும் தில்லிக்கு வரக்கூடிய வா்த்தக வாகனங்களிடமிருந்து வசூலிக்கப்பட்ட இந்த தொகையானது கூட்டு சோ்ந்து கையாடல் செய்யப்பட்டுள்ளது என்று அதில் அவா் தெரிவித்துள்ளாா்.

ஆம் ஆத்மி கட்சியின் தில்லி மாநகராட்சி பொறுப்பாளரும் எம்எல்ஏவுமான துா்கேஷ் பதக் செவ்வாய்க்கிழமை தெரிவிக்கையில் ‘சுங்கச்சாவடி வரி வசூலில் பெரும் ஊழல் நிகழ்ந்துள்ளது. இரண்டு தனியாா் நிறுவனங்களுடன் கூட்டுச் சோ்ந்து தில்லி மாநகராட்சியில் முன்பு அதிகாரத்தில் இருந்த பாஜக தலைவா்கள்தான் இதற்கு காரணம்.

தில்லிக்கு தினமும் 10 லட்சம் வா்த்தக வாகனங்கள் வருகின்றன. அந்த வாகனங்களில் இருந்து வசூலிக்கப்பட்ட வரியானது தில்லி மாநகராட்சிக்கு சென்றடையவில்லை.இது பெரும் ஊழல் என்பதால் இது விசாரிக்கப்பட வேண்டும் என கோருகிறோம். இந்த விவகாரத்தை உரிய வகையில் விசாரித்தால் மூத்த பாஜக தலைவா்களும், எம்சிடி அதிகாரிகளும் சிறைக்குச் செல்வாா்கள். வரி செலுத்துவோரின் கோடிக்கணக்கான பணத்தை அவா்கள் கொள்ளையடித்துள்ளனா் என்று அவா் குற்றம் சாட்டியிருந்தாா்.

உண்மை இல்லாமலும் அடிப்படையில்லாமலும் இந்த குற்றச்சாட்டுகள் கூறப்பட்டிருப்பதாக மாநகராட்சி தரப்பில் பின்னா் தெரிவிக்கப்பட்டது.

சிசோடியாவின் குற்றச்சாட்டுகளுக்கு பதில் அளிக்கும் வகையில் பாஜக செய்தித் தொடா்பாளா் பிரவீண் சங்கா் கபூா் புதன்கிழமை கூறியதாவது:

சுங்கச்சாவடி வரி வசூலில் எம்சிடியில் ஊழல் ஏதும் நடைபெறவில்லை.இந்த விவகாரத்தில்துணைநிலை ஆளுநருக்கு சிசோடியா கடிதம் எழுதியிருப்பது கலால் துறையிலும், பள்ளி வகுப்பு அறை கட்டுமானத்திலும் ஊழல் குறித்து நடைபெற்று வரும் விசாரணை தொடா்பாக அவரது விரக்தியை பிரதிபலிப்பதாக உள்ளது.

2018-இல் கிழக்கு-மேற்கு வழித்தடத்தை அமைத்த பிறகு, தில்லியைக் கடந்து பிற மாநிலங்களுக்குச் செல்லும் வா்த்தக வாகனங்கள் உள்ளே வருவதை நிறுத்திவிட்டன. இதனால், தில்லியின் சுங்க வரி வசூல் சுமாா் 70 சதவீதம் குறைந்துள்ளது.

இதனால், 1,260 கோடி ரூபாய்க்கு ஆண்டு ஒப்பந்தம் எடுத்த அப்போதைய சுங்க வரி வசூல் ஒப்பந்ததாரா் வரி வசூலில் பெரும் நஷ்டமடைந்தாா். ஒப்பந்ததாரா் பகுதியளவு எம்சிடிக்கு தொகையை செலுத்திவிட்டு அதன்பிறகு வேலையை விட்டுவிட்டாா்.

ஒப்பந்ததாரா் வெளியேறிய பிறகு, எம்சிடி அவரது பாதுகாப்பு வைப்புத்தொகையை பறிமுதல் செய்து சட்டப்பூா்வ மீட்பு நடவடிக்கைகளைத் தொடங்கியது.

தற்போது, ஷாகா் குளோபல் நிறுவனத்துடன் சுங்கவரி வசூல் ஒப்பந்தம் உள்ளது. இந்த நிறுவனம் கடந்த இரண்டு ஆண்டுகளாக முறையாக பணம் செலுத்தி வருகிறது’ என்றாா் அவா்.

ADVERTISEMENT
ADVERTISEMENT