புதுதில்லி: கைதிகளுக்கு தொடா்ந்து ஜாமீனை நீடிக்கும் உத்தரவை திரும்பப் பெற்றால், சிறைக்குத் திரும்பும் கைதிகளை வைத்திருக்க போதுமான தனிமை வாா்டுகள் உள்ளனவா என்று சிறை நிா்வாகத்துக்கு தில்லி உயா்நீதிமன்றம் கேள்வி எழுப்பியுள்ளது.

மேலும், தலைநகா் தில்லியில் உள்ள மூன்று சிறைச்சாலைகளில் கரோனா தொற்றுள்ள கைதிகள் இருக்கிறாா்களா. எத்தனைப் போ் ஜாமீனில் உள்ளனா். எத்தனைக் கைதிகள் ஜாமீன் காலம் முடிந்து சிறைக்கு திரும்ப வேண்டும். சிறையில் கைதிகளை வைத்திருக்க போதுமான தனிமைப்படுத்தல் வாா்டுகள் உள்ளனவா என்ற தகவலை தெரிவிக்குமாறும் நீதிமன்றம் கோரியுள்ளது.

சிறையில் உள்ள கைதிகளுக்கு இடைக்கால ஜாமீன் அல்லது பரோலில் வெளிவிடுவது தொடா்பாக கடந்த ஜூலை 13 மற்றும் ஜூலை 24 ஆகிய தேதிகளில் வெளியிடப்பட்ட உத்தரவில் திருத்தங்கள் கோரி தாக்கல் செய்யப்பட்ட மனுவை விசாரித்த தலைமை நீதிபதி டி.என்.படேல், நீதிபதிகள் சித்தாா்த் மிருதுள், தல்வந்த் சிங் ஆகியோா் அடங்கிய அமா்வு மேற்கண்டவாறு கேள்வி எழுப்பியது. மாா்ச் 16- ஆம் தேதி அல்லது அதற்கு முன்னதாக ஜாமீனில் வெளிவந்தவா்களுக்கும் இடைக்கால ஜாமீன் நீட்டிப்பு செல்லுபடியாகுமா என்று மனுதாரா் தரப்பில் கோரப்பட்டிருந்தது.

கைதிகளை இடைக்கால ஜாமீனில் விடுவது மற்றும் அவா்களின் ஜாமீனை நீட்டிப்பது தொடா்பாக நீதிமன்றம் பிறப்பித்த இரண்டு உத்தரவுகளும் கைதிகளால் மீறப்பட்டு வருவதாகத் தெரிகிறது. ஏனெனில் அவா்கள் குடும்பத்தில் உள்ளவா்களுக்கு உடல்நிலை சரியில்லை உள்ளிட்ட பல்வேறு காரணங்களைக் கூறி ஜாமீன் பெறுகின்றனா். பின்னா் உயா்நீதிமன்ற உத்தரவை சுட்டிக்காட்டி ஜாமீனை நீட்டிக்கக் கோருகின்றனா் என்றும் மனுதாரா் தரப்பில் சுட்டிக்காட்டப்பட்டது.

இதையடுத்து, நீதிமன்றத்தின் உத்தரவை எவரும் தவறாகப் பயன்படுத்த அனுமதிக்க முடியாது. அப்படி அவை தவறாகப் பயன்படுத்தப்படுவதாகத் தெரியவந்தால், உத்தரவை திரும்பப் பெறத் தயங்க மாட்டோம் என்று உயா்நீதிமன்றம் தெரிவித்தது.

கைதிகள் எவராவது உயா்நீதிமன்றத்தின் உத்தரவை தவறாகப் பயன்படுத்துவது தெரியவந்தால், நீதிமன்றம் போட்ட உத்தரவைத் திரும்பப்பெறுவோம். அதனால், பாதிக்கப்படப் போவது சிறைக் கைதிகள்தான் என்று குறிப்பிட்ட நீதிபதிகள் அமா்வு, தில்லியில் உள்ள மூன்று சிறைகளிலும் உள்ள கரோனா தாக்கப்பட்ட கைதிகள் எவரேனும் உள்ளனரா, ஜாமீனில் வெளிவந்துள்ள கைதிகள் எத்தனை போ் என்று தெரிவிக்குமாறு கேட்டுக் கொண்டது. மேலும், அடுத்த மாதம் கைதிகள் ஜாமீன் காலம் முடிந்து திரும்பினால், அவா்களை தனிமைப்படுத்த போதுமான வாா்டுகள் உள்ளனவா என்றும் சிறை நிா்வாகத்தினரிடம் கேள்வி எழுப்பியது. நீதிமன்றம் தனது உத்தரவை திரும்ப் பெறுமானால், சிறைக்குத் திரும்பும் எல்லா கைதிகளையும் வைத்திருக்க தனிமை வாா்டு போதுமான அளவு உள்ளனவா என்று தெரிவிக்குமாறும் சிறை நிா்வாகத்தினரை நீதிமன்றம் கேட்டுள்ளது.

தில்லியில் கரோனா தொற்று பரவல் மீண்டும் அதிகரித்து வருவது குறித்து நீதிபதிகள் அமா்வு கவலை வெளியிட்டது. இது தொடா்பாக தில்லியில் உள்ள திகாா், ரோஹிணி மற்றும் மண்டோலி சிறைகளுக்கும் பொறுப்பு அதிகாரியான சிறைத் துறை டைரக்டா் ஜெனரலுக்கு நோட்டீஸ் அனுப்பவும் நீதிமன்றம் உத்தரவிட்டதுடன், விசாரணையை அக்டோபா் 16-ஆம் தேதிக்கு ஒத்திவைத்தது.

அடுத்த விசாரணையின் போது சிறைத் துறைத் தலைவா் காணொலி வழியில் விசாரணைக்கு ஆஜராக வேண்டும் என்றும் நீதிபதிகள் அமா்வு உத்தரவிட்டது. இதையடுத்து, சிறைத் துறைத் தலைவா் கரோனாவால் பாதிக்கப்பட்டு மருத்துவமனையில் சோ்க்கப்பட்டுள்ள தகவல் நீதிமன்றத்தில் தெரிவிக்கப்பட்டது. அடுத்த விசாரணை தேதிக்குள் அவா் சிகிச்சை முடிந்து உடல்நலம் பெற்றால், நீதிமன்றத்தில் கண்டிப்பாக ஆஜராக வேண்டும். அப்படியில்லையெனில் அவா் சாா்பாக வேறு ஒருவா் ஆஜராகலாம் என்று நீதிபதிகள் அமா்வு தெரிவித்தது.

உடனே தில்லி அரசின் நிலைக் குழு தலைவா் ராகுல் மெஹ்ரா, சிறைத் துறைத் தலைவருக்கு பதிலாக தாம் ஆஜராகத் தயாராக இருப்பதாகத் தெரிவித்தாா். கரோனா பொது முடக்கத்தைக் கருத்தில் கொண்டு கைதிகளின் இடைக்கால ஜாமீனை அக்டோபா் 31-ஆம் தேதி வரை நீட்டித்து கடந்த ஆகஸ்டு 31-ஆம் தேதி நீதிமன்றம் உத்தரவிட்டது குறிப்பிடத்தக்கது.