புதுதில்லி

வெளிநாடு சென்று வந்த தில்லி நபருக்கு கரோனா தொற்று: மருத்துவக் கண்காணிப்பில் 700 தனியாா் நிறுவன ஊழியா்கள்!

13th Mar 2020 11:22 PM

ADVERTISEMENT

தேசியத் தலைநகா் வலயம், கிரேட்டா் நொய்டாவில் தோல்பொருள் நிறுவனத்தில் பணியாற்றி வரும் தில்லியைச் சோ்ந்த ஊழியருக்கு கரோனோ தொற்று கண்டறியப்பட்டுள்ளது. இதையடுத்து, அந்த நிறுவனத்தில் பணியாற்றி வரும் 700-க்கும் மேற்பட்ட ஊழியா்கள் மருத்துவக் கண்காணிப்பின் கீழ் கொண்டு வரப்பட்டுள்ளதாக மருத்துவ அதிகாரி வெள்ளிக்கிழமை தெரிவித்தாா்.

இதுகுறித்து கெளதம் புத் நகா் தலைமை மருத்துவ அதிகாரி (சிஎம்ஓ) அனுராக் பாா்கவா தெரிவித்ததாவது: அண்மையில் தில்லியைச் சோ்ந்த 46 வயது இளைஞா் இத்தாலிக்குச் சென்றிருந்தாா். அங்கிருந்து சுவிட்சா்லாந்து சென்று விட்டு அவா் இந்தியா திரும்பினாா். தில்லிக்கு வந்த பிறகு அவரது உடல்நிலை பலவீனமடைந்தது. இதையடுத்து, மருத்துவா்களிடம் சிகிச்சைக்கு சென்றாா். அவரை பரிசோதித்த மருத்துவா்கள் அவருக்கு கரோனா தொற்று இருப்பதைக் கண்டறிந்தனா். மேற்கு தில்லி ஜனக்புரியைச் சோ்ந்த அந்த நபருக்கு கரோனா வைரஸ் பாதிப்பு இருப்பது மாா்ச் 11-ஆம் தேதி உறுதியானது.

எனினும், அவா் வெளிநாடு சென்றுவிட்டு நாடு திரும்பிய நிலையில், கிரேட்டா் நொய்டாவில் தாம் வேலை செய்து வரும் தோல்பொருள் நிறுவனத்திற்கு வேலைக்குச் சென்று வந்தது தெரியவந்தது. இதன் காரணமாக, அந்த நிறுவனத்தைச் சோ்ந்த 707 ஊழியா்கள் மருத்துவக் கண்காணிப்பின் கீழ் கொண்டு வரப்பட்டுள்ளனா். அவருடைய குடும்ப உறுப்பினா்களும், குழந்தைகளும் ஏற்கெனவே கண்காணிப்பின் கீழ் உள்ளனா். மேலும், அந்த நிறுவனத்தில் வல்லுநா்களின் மேற்பாா்வையில் கிருமிநாசினி தெளிப்பு நடவடிக்கைகளும் மேற்கொள்ளப்பட்டு வருகின்றன.

மருத்துவக் கண்காணிப்பின் கீழ் உள்ளவா்களை சுகாதாரத் துறையினா் தொடா்பு கொண்டு அவா்களுக்கு நோய் அறிகுறி ஏதும் இருக்கிா என்பதை பரிசோதனை நடத்தப்பட உள்ளது. நோய்த் தொற்றால் பாதிக்கப்பட்ட நபா், அவரது நிறுவனத்திற்குச் சென்ற போது அலுவலகத்தில் அமா்ந்து பணி செய்துள்ளாா். இதனால், அவா் தொடா்பு கொண்ட நபா்கள் குறைவாக இருப்பதற்கு வாய்ப்புள்ளது. தற்போது வரை கெளதம் புத் நகா் பகுதியில் கரோனா வைரஸால் யாருக்கும் பாதிக்கப்பட்டதற்கான அறிகுறி ஏதும் இல்லை. மக்கள் மிகுந்த முன்னெச்சரிக்கையுடன் இருக்க வேண்டும் என்று அறிவுறுத்தப்பட்டுள்ளனா். இருமல், காய்ச்சல், ஜலதோஷம் அல்லது சோம்பல் ஆகிய பிரச்னைகள் உள்ள மக்கள் மருத்துவா்களிடம் ஆலோசனை பெற வேண்டும் என்றாா் மருத்துவ அதிகாரி அனுராக் பாா்கவா.

ADVERTISEMENT

 

ADVERTISEMENT

MORE FROM THE SECTION

ADVERTISEMENT