கூத்தாநல்லூா் அரசு மகளிா் கல்லூரியில் மாணவிகள் சோ்க்கையை வலியுறுத்தி விழிப்புணா்வுப் பேரணி திங்கள்கிழமை நடைபெற்றது.

கூத்தாநல்லூரில் கலைஞா் மு.கருணாநிதி அரசு மகளிா் கலை மற்றும் அறிவியல் கல்லூரி தொடங்க தமிழக அரசு அறிவிப்பு வெளியிட்டதைத் தொடா்ந்து, அங்குள்ள ஜாமியாத் தொடக்கப் பள்ளியில், இணையதளம் மூலம் இக்கல்லூரிக்கு மாணவிகள் சோ்க்கைப் பணி தொடங்கப்பட்டுள்ளது.

இந்நிலையில், திமுக நகரச் செயலாளா் எஸ்.வி. பக்கிரிசாமி உள்ளிட்டோா் ஏற்பாட்டில், இக்கல்லூரியில் மாணவிகள் சோ்க்கையை வலியுறுத்தி, லெட்சுமாங்குடிப் பாலத்திலிருந்து விழிப்புணா்வுப் பேரணி நடைபெற்றது.

இதில், அரசு பெண்கள் மேல்நிலைப் பள்ளி மாணவிகள், சமூக ஆா்வலா்கள் உள்ளிட்டோா் பங்கேற்றனா். திருவாரூா் எம்எல்ஏ பூண்டி கே. கலைவாணன் தலைமை வகித்து இப்பேரணியை தொடங்கிவைத்தாா். கூத்தாநல்லூா் நகா்மன்றத் தலைவா் மு. பாத்திமா பஷீரா முன்னிலை வகித்தாா்.

மருத்துவமனை சாலை, மேலத்தெரு, பாய்க்காரப் பாலம், சின்னப்பள்ளி வழியாக ஜாமியாத் தொடக்கப் பள்ளியில் அமைக்கப்பட்டுள்ள அரசு மகளிா் கல்லூரி வரை பேரணி நடைபெற்றது. இதில் கல்லூரி முதல்வா் மாறன், நகா்மன்ற துணைத் தலைவா் எம். சுதா்ஸன் உள்ளிட்டோா் பங்கேற்றனா்.