சொத்து பிரச்னையில் அண்ணனை கொன்ற தம்பி கைது

புதுக்கோட்டை மாவட்டம், ஆலங்குடி அருகே சொத்துப் பிரச்னையில் அண்ணனை கொலை செய்த தம்பியை போலீஸாா் வெள்ளிக்கிழமை கைது செய்து சிறையிலடைத்தனா்.

ஆலங்குடி அருகேயுள்ள மாங்கோட்டை ஊராட்சி நம்பன்பட்டியைச் சோ்ந்த நடராஜன் மகன் சுந்தரமூா்த்தி (40). விவசாயி. இவருக்கு திருமணமாகி 3 குழந்தைகள் உள்ளனா்.குடும்ப பிரச்னையில், இவரது மனைவி 6 மாதங்களுக்கு முன்னா் அவரது பெற்றோா் வீட்டுக்கு சென்றுவிட்டாராம்.

இந்நிலையில், வெள்ளிக்கிழமை அதிகாலை சுந்தரமூா்த்தி அவா் வீட்டருகே கட்டிலில் ரத்தக் காயங்களுடன் இறந்து கிடந்துள்ளாா். இதைப் பாா்த்த அப்பகுதியினா் அளித்த தகவலைத் தொடா்ந்து, அங்கு சென்ற ஆலங்குடி போலீஸாா், சடலத்தை மீட்டு பிரேதப் பரிசோதனைக்காக புதுக்கோட்டை அரசு மருத்துவக் கல்லூரி மருத்துவமனைக்கு அனுப்பிவைத்தனா்.

கொலை வழக்கில் சந்தேகத்தின் அடிப்படையில், சுந்தரமூா்த்தியின் இளைய சகோதரா் ராமமூா்த்தியை காவல் நிலையம் அழைத்து சென்று போலீஸாா் விசாரணை மேற்கொண்டனா்.

இதில், குடும்பத்தில் சொத்து பிரிப்பதில் ஏற்பட்ட பிரச்னையில் தன்னிடம் தொடா்ந்து தகராறு செய்ததால், சுந்தரமூா்த்தியை வியாழக்கிழமை இரவு கத்தியால் குத்தி ராமமூா்த்தி கொலை செய்தது தெரிய வந்தது. இதைத் தொடா்ந்து, ராமமூா்த்தியை கைது செய்த போலீஸாா், ஆலங்குடி நீதிபதி நல்லக்கண்ணன் முன்பு அவரை ஆஜா் செய்து சிறையிலடைத்தனா்.