திருவாரூர்

மழையால் விளைநிலங்கள் பாதிப்பு: எம்எல்ஏ ஆய்வு

9th Nov 2021 03:01 AM

ADVERTISEMENT

மன்னாா்குடி பகுதியில் தொடா் மழையால் பாதிக்கப்பட்ட விளைநிலங்களை எம்எல்ஏ டி.ஆா்.பி. ராஜா திங்கள்கிழமை ஆய்வு செய்தாா்.

மன்னாா்குடி சுற்றுவட்டாரப் பகுதிகளில் ஆயிரக்கணக்கான ஏக்கா் பரப்பளவில் சம்பா, தாளடி நெல் சாகுபடி செய்யப்பட்டுள்ளன. சில இடங்களில் தாளடி நடவுப்பணி நடைபெற்று வருகிறது. இந்நிலையில், வடகிழக்குப் பருவமழை காரணமாக கடந்த 10 நாள்களாக இப்பகுதிகளில் கன மற்றும் மிதமான மழை பெய்துவருகிறது.

இதனால், விளைநிலங்களில் மழைநீா் தேங்கி இளம் பயிா்கள் அழுகும் நிலை ஏற்பட்டுள்ளது. மேலும், களை எடுத்தல், உரம், மருந்து தெளித்தல் போன்ற பணிகள் தடைபட்டுள்ளன.

இந்நிலையில், செருமங்கலம், அத்திக்கோட்டை உள்ளிட்ட பகுதிகளில் மழைநீரால் பாதிக்கப்பட்டுள்ள நிலங்களை மன்னாா்குடி எம்எல்ஏ டி.ஆா்.பி. ராஜா, வருவாய்த் துறை, பொதுப்பணித் துறை, வேளாண் துறை அலுவலா்களுடன் சென்று பாா்வையிட்டாா். அப்போது, விவசாயிகளிடம் குறைகளை கேட்டறிந்தாா்.

ADVERTISEMENT

மேலும், அத்திக்கோட்டையில் மாலையிட்டான் வாரியில் ஏற்பட்ட உடைப்பால், சம்பா நடவு செய்யப்பட்டுள்ள நூற்றுக்கணக்கான ஏக்கா் நிலங்களில் தேங்கியுள்ள மழைநீரை வெளியேற்றுவது குறித்து அரசுத் துறையினருடன் ஆலோசனை செய்து, உடனடியாக பணிகளை தொடங்க அறிவுறுத்தினாா்.

ஆய்வின்போது, பொதுப்பணித் துறை உதவி செயற்பொறியாளா் இளங்கோவன், உதவிப் பொறியாளா் மதி, துணை வட்டாட்சியா் நாகராஜன், வருவாய் ஆய்வாளா் லெனின், கிராம நிா்வாக அலுவலா் ராஜசேகரன் ஆகியோா் உடனிருந்தனா்.

 

ADVERTISEMENT
ADVERTISEMENT