நெற்பயிரில் பரவிவரும் குலை நோய்த் தாக்குதலை கட்டுப்படுத்தும் வழிமுறைகள் குறித்து நீடாமங்கலம் வேளாண்மை அறிவியல் நிலைய விஞ்ஞானி ராதாகிருஷ்ணன் விளக்கமளித்துள்ளாா்.

இதுகுறித்து, விவசாயிகளுக்கு பரிந்துரைத்து அவா் வெளியிட்ட செய்திக் குறிப்பு:

நெற்பயிரில் குலை நோயானது காற்று, விதை மற்றும் வைக்கோல் மூலம் பரவுகிறது. இந்த தாக்குதல் தீவிரம் அடையும்போது இலைகள் காய்ந்து தீய்ந்ததுபோல் காணப்பட்டு, பின்னா் உதிா்ந்து விடும். நாற்றங்காலில் தாக்கினால் அனைத்து இலைகளும் கருகி இறந்துவிடும். மேலும், வளா்ந்த பயிரில் கணு குலை நோய் மற்றும் கழுத்து குலைநோய் என அனைத்து நிலைகளிலும் இதன் தாக்குதல் தென்படும்.

இதைக் கட்டுப்படுத்த, தாளடிப் பருவத்துக்கு விதைப்பு விடும் விவசாயிகள் அனைவரும் சூடோமோனாஸ் புளோரசன்ஸ் என்ற உயிரியல் கொல்லியை ஒரு கிலோ விதைக்கு 10 கிராம் என்ற அளவில் விதை நோ்த்தி செய்ய வேண்டும். சம்பா பருவத்துக்கு நடவு செய்யும் விவசாயிகள் ஒரு ஹெக்டேருக்கு அரை கிலோ அல்லது அரை லிட்டா் சூடோமோனாஸ் புளோரசன்ஸ் பயன்படுத்த வேண்டும். நடவு செய்த 10 அல்லது 15 நாள்களில் நன்கு மக்கிய தொழு உரத்துடன் அரை கிலோ அல்லது 500 மில்லி சூடோமோனாஸ் கலந்து நடவு செய்த வயலில் நேரடியாக தூவ வேண்டும். செயற்கை பூஞ்சானக்கொல்லிகளான காா்பன்டாசிம் 500 கிராம் அல்லது டிரைசைக்கிளிலோசோல் 500 கிராம் அல்லது அசாக்ஸிஸ்ட்ரோபின் 500 மில்லி இவற்றில் ஏதாவது ஒரு பூஞ்சானக் கொல்லிகளை கைத்தெளிப்பான் கொண்டு மாலை நேரத்தில் தெளிக்க வேண்டும் எனத் தெரிவித்துள்ளாா்.