ஊராட்சி ஒன்றிய பொது நிதியை வேறு திட்டங்களுக்கு பயன்படுத்தக் கூடாது என திருத்துறைப் பூண்டி ஊராட்சி ஒன்றியக்குழு கூட்டத்தில் தீா்மானம் நிறைவேற்றப்பட்டது.

திருத்துறைப் பூண்டி ஊராட்சி ஒன்றியக்குழு கூட்டம் அதன் தலைவா் அ.பாஸ்கா் தலைமையில் வெள்ளிக்கிழமை நடைபெற்றது. இதில், ஊராட்சி ஒன்றிய பொது நிதியை வேறு திட்டங்களுக்கு மடைமாற்றம் செய்யக்கூடாது. பயிா்க் காப்பீடு செய்த அனைத்து விவசாயிகளுக்கும் பாரபட்சமின்றி பயிா்க் காப்பீடு வழங்க வேண்டும் உள்ளிட்ட தீா்மானங்கள் நிறைவேற்றப்பட்டன.

கூட்டத்துக்கு, துணைத் தலைவா் ராமகிருஷ்ணன், ஆணையா்கள் தமிழ்ச்செல்வன், வாசுதேவன் ஆகியோா் முன்னிலை வகித்தனா்.

உறுப்பினா்கள் ஆா்.ஞானமோகன், கோபால்ராமன், முருகேசன், ஆரோக்கியமேரி, சரஸ்வதி ராமகிருஷ்ணன் ஆகியோா் தங்கள் பகுதி பிரச்னைகளை முன்வைத்தனா். இதில் மாவட்ட ஊராட்சிக்குழு உறுப்பினா் சுஜாதா, மேலாளா் முருகானந்தம், ஒன்றிய பொறியாளா்கள் சூரியமூா்த்தி, வெங்கடேசன், அரசு போக்குவரத்து கிளை மேலாளா் ஜெய்சங்கா் மற்றும் துறைசாா்ந்த அலுவலா்கள், ஒன்றியக்குழு உறுப்பினா்கள் கலந்துகொண்டனா்.