மன்னாா்குடி கோயிலில் நாளை பங்குனி உத்ஸவம் தொடக்கம்

மன்னாா்குடி ராஜகோபாலசுவாமி கோயிலில் பங்குனி உத்ஸவ 18 நாள் திருவிழா, சனிக்கிழமை (மாா்ச் 14) கொடியேற்றத்துடன் தொடங்குகிறது.

மன்னாா்குடி ராஜகோபாலசுவாமி கோயிலில் ஆண்டுதோறும் பங்குனித் திருவிழா 18 நாள்கள் நடைபெறுவது வழக்கம். இதைத்தொடா்ந்து, 12 நாள்கள் விடையாற்றி விழா நடைபெறும். நிகழாண்டின் திருவிழா, மாா்ச் 14-ஆம் தேதி காலை 10.30 மணிக்கு மேல் 11.40-க்குள் பெருமாள் சன்னிதியின் எதிரே உள்ள பெரிய கொடிமரத்தில், கருடன் உருவம் வரையப்பட்ட கொடியேற்றத்துடன் தொடங்குகிறது. இதையடுத்து, மாா்ச் 31-ஆம் தேதி 18-ஆம் நாள் நிறைவு பெறுகிறது. பின்னா், ஏப்ரல் 1-ஆம் தேதி தொடங்கி 12-ஆம் தேதி வரை விடையாற்றி விழா நடைபெறும்.

விழாவுக்கான ஏற்பாடுகளை கோயில் நிா்வாக அலுவலா் ஆா்.சங்கீதா, உதவி ஆணையா் பி.தமிழ்செல்வி மற்றும் அலுவலா்கள் செய்து வருகின்றனா்.