நாகை, மயிலாடுதுறை மற்றும் திருவாரூா் மாவட்டங்களில் அரசுப் பள்ளிகளில் பயிலும் பிளஸ் 2 மாணவ, மாணவிகள் நான் முதல்வன் திட்டத்தில் உயா்கல்வி வழிகாட்டல் களப் பயணமாக கல்லூரிகளுக்கு திங்கள்கிழமை அழைத்துச் செல்லப்பட்டனா்.

தமிழகம் முழுவதும் நான் முதல்வன் திட்டத்தின் கீழ் அனைத்து அரசு மேல்நிலைப் பள்ளிகளில் நிகழாண்டில் பிளஸ் 2 பயிலும் மாணவ, மாணவிகள் உயா் கல்வி நிறுவனங்களை பாா்வையிடும் வகையில், கல்விச் சுற்றுலாவாக அழைத்துச் செல்ல பள்ளிக் கல்வித் துறையால் திட்டமிடப்பட்டது.

அதன்படி, நாகை மாவட்டத்தில் அரசு மேல்நிலைப் பள்ளிகளில் பயிலும் 211 மாணவ, மாணவிகள் உயா் கல்வி பயில அருகாமையில் உள்ள மீன்வள பொறியியல் கல்லூரி, எம்ஜிஆா் மீன்வள கல்லூரி மற்றும் ஆராய்ச்சி நிறுவனம், அரசு கலை மற்றும் அறிவியல் கல்லூரி, வேதாரண்யம் மற்றும் நாகப்பட்டினம் அரசு மருத்துவக் கல்லூரி, அண்ணா பல்கலைக் கழக உறுப்பு பொறியியல் கல்லூரி ஆகிய 7 கல்லூரிகளுக்கு திங்கள்கிழமை அழைத்துச் செல்லப்பட்டனா்.

நாகை மாவட்ட ஆட்சியா் அலுவலகத்தில் இருந்து 12 வழித்தடங்களுக்கு பேருந்துகளில் அழைத்துச் செல்லப்படும் பயணத்தை மாவட்ட ஆட்சியா் அ. அருண் தம்புராஜ் கொடியசைத்து தொடங்கி வைத்தாா். நிகழ்ச்சியில், மாவட்ட முதன்மைக் கல்வி அலுவலா் சுபாஷினி, மாவட்டக் கல்வி அலுவலா் செல்வராஜ், உதவி திட்ட அலுவலா் சாந்தி உள்ளிட்டோா் கலந்து கொண்டனா்.

இம்மாணவ, மாணவிகள் ஒவ்வொரு கல்லூரிகளிலும் செயல்படும் பல்வேறு துறைகள், வகுப்பறைகள், கலையரங்கம், நூலகங்கள், விளையாட்டு மைதானம் ஆகியவற்றை பாா்வையிட்டனா்.

வேதாரண்யம்: வேதாரண்யம் அரசு கலை அறிவியல் கல்லூரிக்கு உம்பளச்சேரி, திருக்கண்ணபுரம், தேவூா், திட்டச்சேரி, திருப்பூண்டி ஆகிய பகுதிகளில் உள்ள அரசுப் பள்ளிகளைச் சோ்ந்த மாணவ- மாணவிகள் அழைத்து வரப்பட்டனா். கல்லூரி முதல்வா் எஸ். சூரியகலா, நாட்டு நலப் பணித் திட்ட அலுவலா் அ. மாரிமுத்து, த.ராஜா உள்ளிட்டோா் பங்கேற்றனா்.

மன்னாா்குடி: திருவாரூா் மாவட்டம், மன்னாா்குடி ராஜகோபாலசுவாமி அரசுக் கல்லூரிக்கு, சுற்றுவட்டப் பகுதியில் உள்ள 20 அரசு மேல்நிலைப் பள்ளிகளில் இருந்து பிளஸ் 2 மாணவ- மாணவிகள் 200 போ் அழைத்து வரப்பட்டனா்.

இவா்களுக்கு, கல்லூரி முதல்வா் து. ராஜேந்திரன், பேராசிரியா்கள் சோ. ரவி, ராமு, பொம்மி உள்ளிட்டோா் கல்லூரியில் உள்ள பாடப் பிரிவுகள் குறித்து விளக்கினா். திட்டத்தின் நோக்கம் குறித்து நான் முதல்வன் திட்ட மாவட்ட ஒருங்கிணைப்பாளா் பேராசிரியா் ப. பிரபாகரன் விளக்கம் அளித்தாா்.