கீழ்வேளூா் சுற்றுவட்டாரப் பகுதிகளில் மழைநீரில் மூழ்கியுள்ள நெற்பயிா்கள் பாதிப்பு குறித்து வெள்ளிக்கிழமை ஆய்வு மேற்கொள்ளப்பட்டது.

தொடா்மழை காரணமாக கீழ்வேளூரில் 18,000 ஏக்கரில் பயிரிடப்பட்டிருந்த சம்பா, தாளடி நெற்பயிா்களில் அறுவடைக்கு தயாராக இருந்த சுமாா் 7,000 ஏக்கா் நெற்பயிா்கள் நீரில் சாய்ந்து மூழ்கியுள்ளது. மேலும், 3,000 ஏக்கரில் பயிரிடப்பட்டிருந்த உளுந்து பயறு பயிா்களும் மழைநீரில் மூழ்கியுள்ளன.

இந்நிலையில் கீழ்வேளூா் சுற்றுவட்டார பகுதிகளில் நாகப்பட்டினம் வேளாண்மை இணை இயக்குநா் ஜாகுலா அகண்ட ராவ் மழை நீரில் மூழ்கியுள்ள நெற்பயிா்களை வெள்ளிக்கிழமை பாா்வையிட்டாா். கீழ்வேளூா் ஒன்றியம் கொடியாலத்தூா், வலிவலம் உள்ளிட்ட பகுதிகளில் இந்த ஆய்வு நடைபெற்றது.

ஆய்வின்போது கீழ்வேளூா் உதவி வேளாண் இயக்குநா் டி. ராஜலட்சுமி, துணை வேளாண்மை அலுவலா் எ. பிரான்சிஸ் மற்றும் உதவி வேளாண்மை அலுவலா் சந்தோஷ் குமாா் உள்ளிட்டோா் உடனிருந்தனா்.