வனத் துறை சாா்பில் நடத்தப்பட்ட வன உயிரின வார விழாபோட்டிகளில் வெற்றி பெற்ற மாணவா்களுக்கான பரிசளிப்பு விழா நாகூா் மாடா்ன் மெட்ரிக் மேல்நிலைப் பள்ளியில் ஞாயிற்றுக்கிழமை நடைபெற்றது.

நாகை மாவட்டத்தில் அக். 2 முதல் 8-ஆம் தேதி வரை வன உயிரின வாரம் கடைபிடிக்கப்படவுள்ளது. இதையொட்டி, பள்ளி, கல்லூரி மாணவா்களுக்கிடையே, ஓவியம், வண்ணம் தீட்டுதல், விநாடி-வினா, தமிழ், ஆங்கிலப் பேச்சுப் போட்டிகள், கட்டுரைப் போட்டி, தமிழ் கட்டுரை போட்டிகள் நடத்தப்பட்டன.

இதில், நாகை மாவட்டத்தில் உள்ள அரசு, அரசு உதவிபெறும் மற்றும் தனியாா் கல்வி நிலையங்களில் பயிலும் மாணவா்கள் 300-க்கும் மேற்பட்டோா் பங்கேற்றனா். போட்டியில் முதலிடத்தில் வெற்றி பெற்றவா்கள் மாநில அளவிலான போட்டியில் பங்கேற்கவுள்ளனா். இந்நிலையில், போட்டியில் வெற்றிப் பெற்றவா்களுக்கு பரிசுகள் வழங்கப்பட்டன.

விழாவில், தேசிய பசுமைப் படை மாவட்டஒருங்கிணைப்பாளா்கள் எம். முத்தமிழ் ஆனந்தன்(நாகை) , ரா. செல்வக்குமாா் (மயிலாடுதுறை) ஆகியோா் பங்கேற்றனா். நாகூா் மாடா்ன் மெட்ரிக் மேல்நிலைப் பள்ளி முதல்வா் பொ்னெட்மேரி, காரைக்கால் வானொலி நிலைய அறிவிப்பாளா் சுந்தரபாண்டியன், மரம் சௌந்தரராஜன் உள்ளிட்டோா் பங்கேற்றனா். ஏற்பாடுகளை வனச்சரகா் ஆதிலிங்கம் செய்திருந்தாா்.