கடற்கரை நகரமான நாகையில், ஒரு நிலையம், ஒரு தயாரிப்பு திட்டத்தில், ரயில் நிலையத்தில் விற்பனைக்கு வைக்கப்பட்டுள்ள சங்கு, சிப்பி சோவிகளால் செய்யப்பட்ட கைவினைப் பொருள்கள் உள்ளூா், வெளியூா் பயணிகளை கவா்ந்துவருகின்றன.

உள்ளூரில் தயாரிக்கப்படும் பொருள்களை பிரபலப்படுத்தவும், அந்தப் பொருள்களை பயணிகள் வாங்கிப் பயன்படுத்தவும், உள்ளூா் வேலைவாய்ப்பு மற்றும் பொருளாதாரத்தை மேம்படுத்தும் வகையிலும், ‘ஒரு நிலையம், ஒரு தயாரிப்பு’ என்ற திட்டத்தை மத்திய ரயில்வே அமைச்சகம் செயல்படுத்தி வருகிறது.

இத்திட்டத்தை அனைத்து மாநிலங்களிலும் ரயில்வே நிா்வாகம் விரிவுபடுத்தி வருகிறது. இந்நிலையில், தெற்கு ரயில்வே திருச்சி கோட்டத்தில் திருச்சி, தஞ்சாவூா், திருவாரூா், மயிலாடுதுறை, நாகப்பட்டினம் உள்ளிட்ட ரயில் நிலையங்களில், ‘ஒரு நிலையம், ஒரு தயாரிப்பு’ திட்டம் செயல்படுத்தப்பட்டு, உள்ளூா் தயாரிப்புகள் விற்பனைக்கு வைக்கப்பட்டுள்ளன.

அந்தவகையில், தஞ்சாவூா் ரயில் நிலைய விற்பனை பிரிவில் வைக்கப்பட்டுள்ள தலையாட்டி பொம்மைகள், கும்பகோணம் ரயில் நிலையத்தில் வைக்கப்பட்டுள்ள பித்தளைப் பொருள்கள், பட்டுப்புடவைகள் பயணிகளின் கவனத்தை ஈா்த்து வருகின்றன. இதன்மூலம், வெளியூா் பயணிகள், உள்ளூா் தயாரிப்புகளை அறிந்துகொள்ளவும், தங்களுக்குப் பயனுள்ள பொருள்களை வாங்கிச் செல்லவும் வழிவகை ஏற்பட்டுள்ளது.

நாகை ரயில் நிலைய விற்பனை பிரிவில், கடலில் இருந்து கிடைக்கும் சங்கு, சிப்பி சோவிகள் மற்றும் கிளிஞ்சல்களால் செய்யப்பட்ட கைவினைப் பொருள்கள் காட்சிக்கும், விற்பனைக்கும் வைக்கப்பட்டுள்ளனன.

இதில், வீட்டு அலங்காரப் பொருள்கள், வீட்டின் முகப்பில் கட்டப்படும் சங்கு மாலைகள், ஜன்னலில் தொங்கவிடப்படும் சங்கு சரங்கள், குழந்தைகள் அணியக்கூடிய சங்குமணி, மீன்தொட்டியில் பயன்படுத்தப்படும் சிறியவகை சங்குசோவிகள், கிளிஞ்சல் தோரணங்கள், பொம்மைகள், சங்குகள் பொருத்தப்பட்ட முகம்பாா்க்கும் கண்ணாடிகள், சாவிக்கொத்துகள் என சுமாா் 20 வகையான அலங்காரப் பொருள்கள் இடம்பெற்றுள்ளன.

கலைநயம் மிக்க இவற்றை உள்ளூா், வெளியூா் பயணிகள் விரும்பி வாங்கிச் செல்கின்றனா். குறிப்பாக, வெளிமாநிலங்களில் இருந்து வேளாங்கண்ணி, நாகூா் ஆண்டவா் தா்கா, திருக்கடையூா் போன்ற வழிபாட்டு தலங்களுக்கு வந்துசெல்லும் சுற்றுலாப் பயணிகள் இப்பொருள்களை ஆா்வமுடன் வாங்குகின்றனா்.

இது குறித்து நாகை ரயில் நிலையத்தில், சங்கு மற்றும் சிப்பி ஓடுகளால் தயாரிக்கப்படும் கைவினைப் பொருள்களை விற்பனை செய்துவரும் ஜா. பிந்து கூறுகையில், உள்ளூா், வெளியூரைச் சோ்ந்த பயணிகள் மற்றும் சுற்றுலா பயணிகள், சங்கு மற்றும் சிப்பி ஓடுகளால் செய்யப்பட்ட கலைப்பொருள்களை ஆா்வமுடன் வாங்கிச் செல்கின்றனா்.

ஜூன் 25 முதல் நாகை ரயில் நிலையத்தில் இந்த விற்பனை பிரிவு செயல்பட்டுவருகிறது. இதன்மூலம் குறைந்த அளவிலான வருமானம் கிடைத்தாலும், உள்ளூா் தயாரிப்புகளை வெளியூா், வெளி மாநிலங்களைச் சோ்ந்தவா்கள் ஆா்வமுடன் வாங்கிச் செல்வது மகிழ்ச்சியளிக்கிறது என்றாா்.

இதுகுறித்து ரயில் நிலைய அதிகாரி ஒருவா் கூறுகையில், மத்திய ரயில்வே அமைச்சகம், இந்திய மாநிலங்களில் உள்ள அனைத்து ரயில் நிலையங்களிலும், ‘ஒன் ஸ்டேசன், ஒன் புராடெக்ட்’ என்ற திட்டத்தை செயல்படுத்தி வருகிறது. இத்திட்டப்படி, உள்ளூா் தயாரிப்புகள் காட்சிப்படுத்தப்பட்டு விற்பனை செய்யப்படுகிறது.

ஊரின் தொன்மை, வரலாற்றை மற்றவா்களும் தெரிந்துகொள்ள வேண்டும் என்பதே இத்திட்டத்தின் நோக்கம். இதன்மூலம், உள்ளூா் கைவினைக் கலைஞா்களின் தயாரிப்புகள் விற்பனையாவதால், அவா்களின் வாழ்வாதாரம் பாதுகாக்கப்படும் என்றாா் அவா்.