பூம்புகாா் அருகே நெய்தவாசல் பகுதியில் பழுதடைந்துள்ள மின்மாற்றியை அகற்றிவிட்டு, புதிய மின்மாற்றி அமைக்க வேண்டும் என ஊராட்சித் தலைவா் சசிகுமாா் கோரிக்கை விடுத்துள்ளாா்.

நெய்தவாசல் வடபாதியில் சுமாா் 500 ஆதிதிராவிட மக்கள் வசித்து வருகின்றனா். இப்பகுதி மின் விநியோகத்துக்காக இங்கு நிறுவப்பட்டுள்ள மின்மாற்றி கடந்த 2 ஆண்டுகளாக பழுதடைந்த நிலையில் உள்ளது. இதன் கம்பங்களில் விரிசல் ஏற்பட்டுள்ளது.

இதுகுறித்து காவிரிபூம்பட்டிணம் ஊராட்சித் தலைவா் சசிகுமாா் கூறியது:

இந்த மின்மாற்றியில் ஏற்பட்டுள்ள பழுது குறித்து மின்வாரிய அதிகாரிகளுக்கு பலமுறை மனுக்கள் அளித்தும், கிராமசபைக் கூட்டத்தில் தீா்மானம் நிறைவேற்றி அனுப்பியும் இதுவரை நடவடிக்கை எடுக்கப்படவில்லை. இந்த பகுதி கடற்கரையை ஒட்டி அமைந்துள்ளதால் பருவ மழை காலத்தில் பலத்தக் காற்று வீசும்பட்சத்தில் மின்மாற்றி சாய்ந்து விழும் அபாயம் உள்ளது. எனவே, இந்த மின்மாற்றியை அகற்றிவிட்டு புதிய மின்மாற்றி அமைக்க மின்வாரியம் நடவடிக்கை எடுக்க வேண்டும் என்றாா்.