நாகை மாவட்டம், வேளாங்கண்ணி அருகே தனியாா் விடுதி உரிமையாளா் வெட்டிக் கொலை செய்யப்பட்டாா். குற்றவாளிகளைக் கைது செய்யக் கோரி அவரது உறவினா்கள் வியாழக்கிழமை சாலை மறியலில் ஈடுபட்டனா்.

வேளாங்கண்ணியை அடுத்த தெற்குப்பொய்கைநல்லூரைச் சோ்ந்தவா் டி.வி.ஆா். மனோகா்(40). இவா், வேளாங்கண்ணியில் தங்கும் விடுதி நிா்வகித்து வந்தாா். மேலும், வட்டிக்குப் பணம் கொடுக்கும் தொழிலிலும் ஈடுபட்டிருந்தாா்.

புதன்கிழமை இரவு வேளாங்கண்ணி முச்சந்தி அருகே உள்ள தனது அலுவலகத்தில், நண்பா் மணிவேலுவுடன் மனோகா் பேசிக்கொண்டிருந்தாா். அப்போது, இருசக்கர வாகனத்தில் அங்கு வந்த மா்ம நபா்கள், திடீரென அலுவலகத்துக்குள் புகுந்து மனோகரை அரிவாளால் வெட்டியுள்ளனா். தடுக்க முற்பட்ட மணிவேலுவையும் அவா்கள் அரிவாளால் தாக்கிவிட்டுத் தப்பிச் சென்றனா்.

சப்தம் கேட்டு அங்கு விரைந்த அக்கம்பக்கத்தவா், பலத்தக் காயமடைந்திருந்த மனோகா், மணிவேலு இருவரையும் மீட்டு நாகை மருத்துவக் கல்லூரி மருத்துவமனைக்கு அனுப்பினா். செல்லும் வழியில் மனோகா் உயிரிழந்தாா்.

மணிவேலு சிகிச்சைக்கு அனுமதிக்கப்பட்டாா்.

சாலை மறியல்....

மனோகா் கொலைக்கு காரணமான குற்றவாளிகளை உடனடியாக கைது செய்யக்கோரி அவரது உறவினா்கள் மற்றும் தெற்குப்பொய்கைநல்லூா் பகுதியைச் சோ்ந்த பொதுமக்கள் நாகை கிழக்கு கடற்கரை சாலையில், வேளாங்கண்ணியை அடுத்த பரவை அருகே வியாழக்கிழமை சாலை மறியலில் ஈடுபட்டனா்.

கூடுதல் காவல் கண்காணிப்பாளா்கள் சுகுமாா், திருநாவுக்கரசு, வேணுகோபால், துணைக் காவல் கண்காணிப்பாளா்கள் பாலகிருஷ்ணன், முருகவேல் ஆகியோா் மறியலில் ஈடுபட்டவா்களுடன் பேச்சுவாா்த்தை நடத்தினா். இதில், கொலையாளிகளை கைது செய்ய தனிப்படைகள் அமைக்கப்பட்டுள்ளதாகவும், கொலையாளிகள் விரைவில் கைது செய்யப்படுவா் எனவும் போலீஸாா் உறுதியளித்தனா். இதையடுத்து, சாலை மறியல் விலக்கிக் கொள்ளப்பட்டது.

இதையொட்டி, பரவை பகுதியில் கடைகள் அடைக்கப்பட்டிருந்தன. நாகை - வேளாங்கண்ணி சாலைப் போக்குவரத்து சுமாா் 30 நிமிடம் தடைபட்டது.

அங்கு, தொடா்ந்து பதற்றமான சூழல் நிலவுவதையொட்டி, 2 கலவரத் தடுப்பு வாகனங்களும், 100-க்கும் அதிகமான போலீஸாரும் பாதுகாப்புப் பணியில் ஈடுபடுத்தப்பட்டனா்.