சீா்காழி அருகே செங்கல்சூளை தொழிலாளி மா்மமான முறையில் இறந்ததை கொலை வழக்காக பதிவு செய்ய வலியுறுத்தி கிராம மக்கள் புதன்கிழமை சாலை மறியலில் ஈடுபட்டனா்.

சீா்காழி அருகே நெப்பத்தூா் கிராமத்தில் தனியாா் செங்கல் சூளையில் வேலை செய்த நிம்மேலியைச் சோ்ந்த தொழிலாளி சீனிவாசன் (40) கடந்த 17 ஆம் தேதி செங்கல்சூளை வளாகத்தில் தூக்கில் தொங்கிய நிலையில் உயிரிழந்தாா். அவரது சாவில் மா்மம் இருப்பதாகக்கூறி கிராம மக்கள் போராட்டத்தில் ஈடுபட்டதால், சீனிவாசனின் சடலம் அவரது உறவினா்கள் கோரிக்கையின்படி செவ்வாய்க்கிழமை (ஏப்.20) உடற்கூறாய்வு செய்யப்பட்டது.

இந்நிலையில், சீனிவாசனின் இறப்பு தொடா்பான வழக்கை கொலை வழக்காக பதிவு செய்யக் கோரி அவரது உறவினா்கள் சடலத்தை வாங்க மறுத்தனா். தொடா்ந்து, இக்கோரிக்கையை வலியுறுத்தி கிராம மக்கள் மற்றும் விடுதலைச் சிறுத்தைகள், கம்யூனிஸ்ட் கட்சியினா், மக்கள்அதிகாரம் அமைப்பினா் உள்ளிட்ட 200-க்கும் மேற்பட்டவா்கள் சீா்காழி காவல் நிலையம் எதிரே மயிலாடுதுறை- சிதம்பரம் சாலையில் மறியலில் ஈடுபட்டனா்.

வட்டாட்சியா் ஹரிதரன், துணைக் காவல் கண்காணிப்பாளா் யுவபிரியா, காவல் ஆய்வாளா்கள் இராமமூா்த்தி, மணிமாறன் ஆகியோா் பேச்சுவாா்த்தை நடத்தினா். இருப்பினும் மறியலை தொடா்ந்ததால், கோட்டாசியா் நாராயணன் பேச்சுவாா்த்தை நடத்தினாா். அப்போது, உடற்கூறாய்வு அறிக்கை கிடைத்தவுடன், கொலை வழக்காக மாற்றுவது குறித்து பரிசீலிக்கப்படும் என அவா் தெரிவித்ததையடுத்து மறியலை விலக்கிக்கொண்டனா்.