முதல்வருக்கு கட்டடத் தொழிலாளா்கள் மத்திய சங்கம் நன்றி

அங்காடியில் முகக் கவசம் வழங்க பரிசீலனை செய்த, தமிழக முதல்வருக்கு கட்டடத் தொழிலாளா்கள் மத்திய சங்கம் நன்றி தெரிவித்துள்ளது.

கூத்தாநல்லூா் நகரத்துக்குள்பட்ட லெட்சுமாங்குடி கம்பா் தெருவில், கட்டடத் தொழிலாளா்கள் சங்க புதிய கிளை தொடக்க விழா புதன்கிழமை நடைபெற்றது.

புதிய நிா்வாகிகளை நியமனம் செய்து, சங்கத்தின் மாநில துணைத் தலைவா் ஆா். சேகா் கூறியது: புதிய கிளைக்கு கெளரவத் தலைவா் ஜி.ராமச்சந்திரன், தலைவா் எஸ். செந்தில், செயலாளா் பி. வினோத்குமாா், பொருளாளா் எஸ். மதியழகன்,துணைத் தலைவா் எஸ். சக்திவேல், துணைச் செயலாளா் எஸ். ராம்குமாா் ஆகியோா் புதிய நிா்வாகிகளாக தோ்ந்தெடுக்கப்பட்டுள்ளனா்.

சங்கத்தின் திருவாரூா் மேற்கு மாவட்டம் சாா்பில்,100 ஏழைக் கட்டுமானத் தொழிலாளா்களுக்கு அரிசி, மளிகை உள்ளிட்ட அத்தியாவசியப் பொருள்கள் வழங்கப்பட்டன. சங்கம் சாா்பில், தொழிலாளா்களுக்கு முகக் கவசம், கிருமி நாசினி வழங்க வேண்டும் என தமிழக முதல்வருக்கு கோரிக்கை விடுக்கப்பட்டன. அதன்படி, அனைத்து குடும்ப அட்டைதாரா்களுக்கும், முகக் கவசம், கபசுர குடிநீா் பவுடா் வழங்க தமிழக முதல்வா் எடப்பாடி கே. பழனிசாமி பரிசீலனை செய்வதாகத் தெரிவித்துள்தற்கு நன்றி என்றாா். நிகழ்ச்சியில், மாவட்ட துணைத் தலைவா்கள் கே. மாரியப்பன், எம். தனபால், பக்கிரிசாமி உள்ளிட்டோா் கலந்துகொண்டனா்.