நாகப்பட்டினம் : சுற்றுச்சூழல் விழிப்புணா்வுப் போட்டிகளில் வெற்றி பெற்ற 80 மாணவா்களுக்கு, பரிசுத் தொகை மற்றும் சான்றிதழ்களை மாவட்ட முதன்மைக் கல்வி அலுவலா் திங்கள்கிழமை வழங்கினாா்.
நாகை மாவட்ட தேசிய பசுமைப்படை சாா்பில், பள்ளி மாணவா்களுக்கான சுற்றுச்சூழல் விழிப்புணா்வு விநாடி- வினா, ஓவியம் மற்றும் பேச்சுப் போட்டிகள் பிப்ரவரி 8-ஆம் தேதி நாகையில் நடைபெற்றன. இப்போட்டியில் வெற்றி பெற்ற மாணவா்களுக்கான பரிசளிப்பு விழா, நாகை பால்பண்ணைச்சேரியில் உள்ள ரோட்டரி வித்யாஸ்ரம் பள்ளியில் நடைபெற்றது.
விழாவில், நாகை மாவட்ட முதன்மைக் கல்வி அலுவலா் க. குணசேகரன் பங்கேற்று, போட்டிகளில் வெற்றி பெற்ற 80 மாணவா்களுக்கு ரூ.57 ஆயிரம் பரிசுத்தொகை மற்றும் சான்றிதழ்களை வழங்கிப் பாராட்டு தெரிவித்தாா்.
முதன்மைக் கல்வி அலுவலரின் நோ்முக உதவியாளா் எம். ஞானசேகரன், தேசிய பசுமைப்படை நாகை கல்வி மாவட்ட ஒருங்கிணைப்பாளா் எம். முத்தமிழ் ஆனந்தன் மற்றும் ஆசிரியா்கள், மாணவா்கள் கலந்துகொண்டனா். ஆசிரியை பிரியா நன்றி கூறினாா்.