நாகப்பட்டினம்

சகோதரியை தீ வைத்து எரிக்க முயன்ற சம்பவம்: சகோதரா் உள்பட இருவா் உயிரிழப்பு

22nd Feb 2020 08:46 AM

ADVERTISEMENT

நாகை மாவட்டம், சீா்காழியில் சொத்து தகராறில் தனது இளைய சகோதரி மீது பெட்ரோல் ஊற்றி தீவைக்க முயன்ற இளைஞா், தானும் தீக்குளித்து தற்கொலை செய்து கொண்டாா். இதில், தீக்காயமடைந்த உறவினா் ஒருவரும் வியாழக்கிழமை உயிரிழந்தாா்.

புத்தூா் கடைவீதியைச் சோ்ந்த நரசிம்மன் மகன் மகேஷ் (39). இவரது தங்கை மஞ்சுளா (35) சீா்காழி திருவள்ளுவா் நகரில் தனது கணவருடன் வசித்து வருகிறாா். இந்நிலையில், மகேஷ், மஞ்சுளா ஆகியோரின் பூா்வீக சொத்து (கடை) சீா்காழி பழைய பேருந்து நிலையம் அருகில் உள்ளதாகக் கூறப்படுகிறது. இதை பங்கு பிரிப்பதில் இருவருக்கும் இடையே பிரச்னை இருந்து வந்ததாம்.

இதனால், மன உளைச்சலில் இருந்த மகேஷ், கடந்த 15-ஆம் தேதி மஞ்சுளா வீட்டிற்கு சென்றுள்ளாா். இதனிடையே, பென்னாடம் அய்யனாா் கோயில் தெருவைச் சோ்ந்த மஞ்சுளாவின் மாமா தமிழரசன் (40), சீா்காழி அருகே செம்பனாா்கோவிலில் துக்க காரியத்துக்குச் செல்வதற்காக மஞ்சுளாவின் வீட்டில் வந்து தங்கி உள்ளாா்.

இந்நிலையில் தன்னுடைய திருமணத்துக்கும், வாழ்கையின் முன்னேற்றத்திற்கும் மஞ்சுளா தடையாக இருப்பதாகக் கூறி, தான் கொண்டுவந்திருந்த பெட்ரோலை தங்கை மீது மகேஷ் வீசியுள்ளாா். அப்போது மஞ்சுளா நகா்ந்து விட்டதால் பெட்ரோல் தமிழரசன் மீது விழுந்தது. உடனடியாக மகேஷ் தன் மீதும் பெட்ரோலை ஊற்றிக்கொண்டு, தீ வைத்துக் கொண்டாா்.

ADVERTISEMENT

மகேஷ், தமிழரசன் இருவரும் தீயில் எரிவதைக் கண்ட மஞ்சுளா மற்றும் உறவினா்கள், தீயை அணைத்து இருவரையும் திருவாரூா் மருத்துவக் கல்லூரி மருத்துவமனைக்கு கொண்டு சென்றனா். எனினும், மகேஷ் கடந்த 19-ஆம் தேதியும், தமிழரசன் கடந்த 20-ஆம் தேதியும் உயிரிழந்தனா். இது குறித்து சீா்காழி காவல் ஆய்வாளா் மணிமாறன், உதவி ஆய்வாளா் ராஜா ஆகியோா் வழக்குப் பதிந்து விசாரணை மேற்கொண்டுள்ளனா்.

ADVERTISEMENT
ADVERTISEMENT