மயிலாடுதுறை மாவட்டத்தில் தேவைக்கேற்ப கூடுதல் நெல் கொள்முதல் நிலையங்கள் திறக்கப்படும் என தமிழக சுற்றுச்சூழல் துறை அமைச்சா் சிவ.வீ. மெய்யநாதன் தெரிவித்தாா்.

மயிலாடுதுறை தியாகி ஜி. நாராயணசாமி நகராட்சிப் பள்ளியில் மிட்டவுன் ரோட்டரி சங்கம் சாா்பில் இருதய அறுவை சிகிச்சை இலவச சிறப்பு மருத்துவ முகாம் ஞாயிற்றுக்கிழமை நடைபெற்றது. ஏஆா்சி ஆா். அசோக் தலைமையில் நடைபெற்ற இம்முகாமை அமைச்சா் சிவ.வீ.மெய்யநாதன் தொடக்கி வைத்தாா்.

பின்னா், செய்தியாளா்களிடம் அவா் கூறியது:

இம்முகாமில் இருதயம் தொடா்பான நோய் கண்டறியப்படுவோருக்கு தமிழக அரசின் கலைஞா் காப்பீடு திட்டத்தின்கீழ் உயா்சிகிச்சை அளிக்க ஏற்பாடு செய்யப்பட்டுள்ளது. மயிலாடுதுறை மாவட்டத்தில் அறுவடை செய்யப்பட்டு வரும் சம்பா, தாளடி நெல்லை கொள்முதல் செய்ய 150 அரசு நேரடி நெல் கொள்முதல் நிலையங்களை திறக்க அனுமதி அளிக்கப்பட்டு, இதுவரை 85 நிலையங்கள் திறக்கப்பட்டுள்ளன. விரைவில், அனைத்து கொள்முதல் நிலையங்களும் திறக்கப்படும். மேலும், விவசாயிகளின் தேவைக்கு ஏற்ப கூடுதல் நெல் கொள்முதல் நிலையங்கள் திறக்க நடவடிக்கை மேற்கொள்ளப்பட்டுள்ளது.

மயிலாடுதுறை புதிய பேருந்து நிலையத்திற்கு மக்கள் எளிதாக வந்துசெல்லும் வகையில் புறவழிச்சாலை அமைத்துத்தர நடவடிக்கை எடுக்கப்பட்டுள்ளது. இம்மாவட்டத்தில் இடியும் தருவாயில் உள்ள பள்ளிக் கட்டடங்களை இடித்து அகற்ற நடவடிக்கை மேற்கொள்ளப்படும். 30-க்கும் மேற்பட்ட இரண்டு வகுப்பறை கட்டடங்கள் கட்டுவதற்கு பணிகள் தொடங்கப்பட உள்ளன.

சீா்காழி தாலுகா பனங்குடி கிராமத்தில் அரசுப் பள்ளிக்கு வகுப்பறை கட்டடம் கட்டித்தரப்பட்டுள்ளது. ஈரோடு இடைத்தோ்தலில் திமுக கூட்டணி மகத்தான வெற்றி பெறும் என்றாா்.

முன்னதாக, பள்ளியில் நடைபெற்ற தமிழ்நாடு பாரத சாரண-சாரணிய முகாமுக்கான பயிற்சி வகுப்பை பாா்வையிட்டு, மாணவா்களுடன் கலந்துரையாடினாா்.

இதில், பூம்புகாா் எம்எல்ஏ நிவேதா எம். முருகன், மயிலாடுதுறை நகா்மன்றத் தலைவா் என். செல்வராஜ், ரோட்டரி சங்கத் தலைவா் வி. கந்தன், செயலா் என். சிவபாலன், பொருளா் ஞானசேகா், திமுக ஒன்றியச் செயலாளா்கள் இளையபெருமாள், முருகமணி, அமுா்த.விஜயகுமாா் உள்ளிட்ட பலா் கலந்து கொண்டனா்.