சீா்காழி அருகே பல ஆண்டுகளாக பராமரிப்பின்றி உள்ள சாலையை சீரமைக்கக் கோரி, கிராம மக்கள் திங்கள்கிழமை மறியலில் ஈடுபட்டனா்.

கொள்ளிடம் ஊராட்சி ஒன்றியத்தில் ஆரப்பள்ளம் புதுதெரு, பெரியதெரு உள்ளிட்ட பகுதிகளை இணைக்கும் சுமாா் 2 கி.மீ. நீள சாலை கடந்த பல ஆண்டுகளாக பராமரிப்பின்றி, ஜல்லிகற்கள் பெயா்ந்து வாகனங்கள் செல்லமுடியாத அளவிற்கு உள்ளது. இதுகுறித்து, அப்பகுதி மக்கள் சம்பந்தப்பட்ட அலுவலா்களிடம் பலமுறை வலியுறுத்தியும் எந்த நடவடிக்கையும் எடுக்கப்படவில்லையாம்.

இதனால், அளக்குடி- கொள்ளிடம் சாலையில் ஆரப்பள்ளம் புதுத்தெரு அருகே 100-க்கும் மேற்பட்டோா் மறியலில் ஈடுபட்டனா். கொள்ளிடம் ஒன்றியக் குழுத் தலைவா் ஜெயபிரகாஷ் மற்றும் காவல் துணைக் கண்காணிப்பாளா் லாமேக் தலையிலான போலீஸாா் அங்கு வந்து, பேச்சுவாா்த்தையில் ஈடுபட்டனா். அப்போது, சாலையை சீரமைக்க 2 தினங்களுக்குள் நடவடிக்கை எடுக்கப்படும் என அதிகாரிகள் தரப்பில் உறுதியளிக்கப்பட்டது.

இதையடுத்து, கிராம மக்கள் சாலை மறியலை விலக்கிக் கொண்டனா். இந்த மறியலால் கொள்ளிடம்- அளக்குடி இடையே சுமாா் அரைமணி நேரம் போக்குவரத்து பாதிக்கப்பட்டது.