மயிலாடுதுறை

தருமபுரம் ஆதீனம் ரத யாத்திரை

24th Jan 2022 10:49 PM

ADVERTISEMENT

தருமபுரம் ஆதீனம் 27-ஆவது குருமகா சந்நிதானம் ஸ்ரீலஸ்ரீ மாசிலாமணி தேசிக ஞானசம்பந்த பராமாசாரிய சுவாமிகள் திருமுல்லைவாசலுக்கு ரதயாத்திரையாக திங்கள்கிழமை வந்தாா்.

திருமுல்லைவாசல் மீனவ கிராமத்தில் தருமபுரம் ஆதீனத்துக்குள்பட்ட அணிகொண்டகோதை உடனுறை முல்லைவனநாதா் கோயில் உள்ளது. ஜன.27-ஆம் தேதி இக்கோயில் கும்பாபிஷேகம் நடைபெறவுள்ள நிலையில், திங்கள்கிழமை (ஜன.24) 6 கால யாகசாலை பூஜைகள் தொடங்கின.

இதற்கிடையே, திருநின்றியூா் லட்சுமிபுரீஸ்வரா் சுவாமி கோயில் கும்பாபிஷேகத்துக்காக தருமபுரம் மடத்தில் உள்ள சொக்கநாதா் பெருமானுடன் கடந்த வியாழக்கிழமை தருமபுரம் ஆதீனம் 27-ஆவது குருமகாசந்நிதானம் திருநின்றியூா் கும்பாபிஷேகத்தில் பங்கேற்றாா்.

தொடா்ந்து, அங்கிருந்து திருமுல்லைவாசல் முல்லைவனநாதா் கோயில் கும்பாபிஷேகத்துக்கு சொக்கநாதா் பெருமானுடன் தருமபுரம் ஆதீனம் திருநின்றியூரிலிருந்து ரதயாத்திரையாக சீா்காழிக்கு வந்தாா். சுமாா் 30 ஆண்டுகளுக்குப் பிறகு தற்போது சீா்காழியில் சொக்கநாதருடன் தருமபுரம் ஆதீனம் 27-ஆவது குருமகா சந்நிதானம் ரதயாத்திரையாக வந்தாா். அப்போது, பொதுமக்கள் சொக்கநாதா் பெருமானை தரிசனம் செய்து, ஆதீனத்திடம் அருளாசி பெற்றனா். பின்னா் திருமுல்லைவாசல் முல்லைவனநாதா் கோயிலுக்கு யாத்திரை சென்றடைந்தது.

ADVERTISEMENT

திருமுல்லைவாசல் ஜமாத்தினா் வரவேற்பு: திருமுல்லைவாசலுக்கு ரதயாத்திரையாக வந்த தருமபுரம் ஆதீனத்துக்கு திருமுல்லைவாசல் மேலமுஹல்லம் ஜாமிமஸ்ஜித்தினா், இஸ்லாமியா்கள் வரவேற்பு அளித்தனா்.

ADVERTISEMENT
ADVERTISEMENT