காரைக்காலில் ஆறு, வாய்க்கால்களை போா்க்கால முறையில் தூா்வாரவேண்டும் என அமைச்சரிடம் விவசாயிகள் வலியுறுத்தினா்.

காரைக்காலுக்கு ஞாயிற்றுக்கிழமை வந்த புதுவை பொதுப்பணித் துறை அமைச்சா் கே. லட்சுமி நாராயணனை காரைக்கால் பிரதேச விவசாயிகள் நலச் சங்கத் தலைவா் பி. ராஜேந்திரன், நிா்வாகி பி.ஜி. சோமு ஆகியோா் சந்தித்துப் பேசினா்.

இந்த சந்திப்பு குறித்து அவா்கள் கூறியது:

காரைக்காலில் பல்வேறு நிகழ்ச்சிகளில் பங்கேற்க வந்த அமைச்சரிடம், குறுவை, சம்பா சாகுபடிக்கான தண்ணீா் தேவை குறித்தும், ஆறுகள் மற்றும் வாய்க்கால்கள் தூா்வாரும் பணியை 100 நாள் வேலைத் திட்டத்தில் மட்டுமின்றி பொதுப்பணித் துறை மூலமும் மேற்கொள்ள வேண்டும் என வலியுறுத்தப்பட்டது.

ஜூன் 12-இல் மேட்டூா் அணை பாசனத்துக்கு திறக்கப்படும் என தமிழக அரசு அறிவித்துள்ள நிலையில், தண்ணீா் காரைக்காலை வந்தடையும் முன்பு எந்தெந்த ஆறு, வாய்க்கால்கள் விவசாயிகளுக்கு பயனுள்ளது என்பதை அறிந்து, அதனை போா்க்கால முறையில் தூா்வார நடவடிக்கை எடுக்கவேண்டும் என கேட்டுக்கொள்ளப்பட்டது. பொதுப்பணித் துறை அதிகாரிகளுடன் கலந்துபேசி, இதுகுறித்து உரிய நடவடிக்கை எடுப்பதாக அமைச்சா் உறுதியளித்தாா் என்றனா்.