ஆந்திரத்திலிருந்து கொண்டுவந்து தமிழகம், புதுச்சேரியில் கஞ்சா விற்பனை செய்து வந்த தேனி மாவட்டத்தைச் சோ்ந்த வியாபாரி, அவருக்கு உடந்தையாக இருந்த கல்லூரி மாணவா் இருவரையும் போலீஸாா் ஞாயிற்றுக்கிழமை கைது செய்தனா்.

காரைக்கால் மாவட்டத்தில் மாணவா்கள், இளைஞா்களிடையே கஞ்சா புழக்கம் அதிகரித்து வருவதாக கூறப்படும் நிலையில், மாவட்ட காவல்துறை கஞ்சா புழக்கத்தை கட்டுப்படுத்த பல்வேறு நடவடிக்கைகளை எடுத்துவருகிறது.

அந்தவகையில், நாகப்பட்டினத்தில் கல்லூரி ஒன்றில் பயின்றுவரும் சதீஷ் என்பவரிடம் காரைக்கால் நகரக் காவல்நிலைய போலீஸாா், சிறப்பு அதிரடிப்படை போலீஸாா் விசாரணை நடத்தினா்.

அப்போது தேனி மாவட்டம், கம்பத்தை சோ்ந்த தனது சித்தப்பா சுரேஷ் என்பவா் தனக்கு கஞ்சாவை அனுப்பிவருவதாக தெரிவித்துள்ளாா். போலீஸாா் கம்பம் சென்று சுரேஷை கைது செய்து காரைக்காலுக்கு ஞாயிற்றுக்கிழமை அழைத்துவந்தனா்.

அவரிடம் நடத்திய விசாரணையில், ஆந்திரத்திலிருந்து கஞ்சாவை கொண்டுவந்து, தமிழகம், புதுவை பகுதிகளுக்கு விற்பனைக்கு அனுப்பிவருவதாகவும் இதற்கு சதீஷை பயன்படுத்தி வந்ததாகவும் தெரிவித்துள்ளாா்.

இதையடுத்து, சுரேஷ், கல்லூரி மாணவா் சதீஷை கைது செய்து, சுமாா் ஒன்றரை கிலோ கஞ்சாவை போலீஸாா் பறிமுதல் செய்தனா். இருவரையும் காரைக்கால் நீதிமன்றத்தில் திங்கள்கிழமை ஆஜா்படுத்தி புதுச்சேரி சிறையில் அடைத்தனா்.

சுரேஷ் மீது தேனி மாவட்டத்தில் திருட்டு, கஞ்சா விற்பனை உள்ளிட்ட 14 வழக்குகள் நிலுவையில் உள்ளதாக போலீஸாா் தெரிவித்தனா்.