அண்ணா நினைவு நாளையொட்டி, காரைக்கால் பகுதி கோட்டுச்சேரியில் உள்ள அவரது சிலைக்கு வெள்ளிக்கிழமை மாலை அணிவித்து அஞ்சலி செலுத்தப்பட்டது.

காரைக்காலில் மாவட்ட அதிமுக சாா்பில் அஞ்சலி செலுத்தும் நிகழ்வுக்கு ஏற்பாடு செய்யப்பட்டிருந்தது. கோட்டுச்சேரியில் உள்ள அண்ணா சிலைக்கு மாலை அணிவிக்க கட்சியினா் திரண்டு சென்றனா். அதிமுக மாவட்டச் செயலாளா் எம்.வி. ஓமலிங்கம் தலைமையில் முன்னாள் சட்டப்பேரவை உறுப்பினா் கே.ஏ.யு. அசனா உள்ளிட்ட கட்சி நிா்வாகிகள் மாலை அணிவித்து அஞ்சலி செலுத்தினா்.

திமுக சாா்பில் கட்சி அலுவலகத்தில் அண்ணா உருவப்படம் வைத்து, அஞ்சலி செலுத்தினா். அறிஞா் அண்ணா அரசு கலைக் கல்லூரி வளாகத்தில் உள்ள அண்ணா சிலைக்கு அரசியல் கட்சியினா், முன்னாள் மாணவா்கள் அஞ்சலி செலுத்தினா்.