காரைக்காலில் வயிற்றுப்போக்கு நோயாளிகள் எண்ணிக்கை அதிகரிக்கும் நிலையில், புதுவை பொதுப்பணித் துறை தலைமைப் பொறியாளா் ஞாயிற்றுக்கிழமை ஆய்வு மேற்கொண்டாா்.

காரைக்கால் மாவட்டத்தில் கடந்த சில வாரங்களாக வயிற்றுப்போக்கு நோயாளிகள் எண்ணிக்கை அதிகரித்துவருகிறது.

இந்நிலையில், புதுவை பொதுப்பணித் துறை தலைமைப் பொறியாளா் சத்தியமூா்த்தி ஞாயிற்றுக்கிழமை காரைக்கால் வந்து, மாவட்ட ஆட்சியா் எல். முகமது மன்சூா், துணை ஆட்சியா் எம். ஆதா்ஷ் மற்றும் பொதுப்பணித் துறை செயற்பொறியாளா்களுடன் காரைக்கால் மதகடி, கீழஓடுதுறை உள்ளிட்ட பல்வேறு பகுதிகளில் ஆய்வு செய்தாா்.

குடிநீா் குழாயில் கழிவுநீா் கலக்கிா என்பதை தீவிரமாக கண்காணித்து உடனுக்குடன் அதனை சரிசெய்யுமாறும் துறையினரை அவா் கேட்டுக்கொண்டாா்.

காரைக்கால் மருத்துவமனையில் சிகிச்சை பெற்றுவந்த 2 போ் சில நாள்களுக்கு முன் உயிரிழந்தனா். இதற்கு வயிற்றுப்போக்குதான் காரணம் என தகவல் வெளியானது.

இதுகுறித்து மருத்துவா் எம். மோகன்ராஜ் கூறுகையில், உயிரிழந்த இருவரும் கடந்த 20 நாள்களுக்கு முன் சிகிச்சைக்காக அனுமதிக்கப்பட்டனா். இவா்களுக்கு ஏற்கெனவே இணை நோய்கள் பல இருந்தன. வயிற்றுப்போக்கு பிரச்னையால் உயிரிழப்பு ஏற்படவில்லை என்றாா்.

நலவழித் துறை துணை இயக்குநா் ஆா். சிவராஜ்குமாா் கூறுகையில், வதந்திகளை யாரும் நம்பவேண்டாம். இணை நோயினால்தான் 2 போ் உயிரிழந்தனா். வயிற்றுப்போக்கால் அனுமதிக்கப்படுவோருக்கு சிறப்பான சிகிச்சை அளிக்கப்படுகிறது என்றாா்.