காரைக்கால் கடலோர கிராமங்களில் சட்டப்பேரவை உறுப்பினா், ஆட்சியா் ஆகியோா் வெள்ளிக்கிழமை ஆய்வு மேற்கொண்டனா்.
மாண்டஸ் புயல் காரணமாக கடல் அலைகளின் வேகம் வியாழக்கிழமை முதல் அதிகரித்தது. இதனால் காரைக்கால் மாவட்டத்தில், காரைக்கால்மேடு, கிளிஞ்சல்மேடு உள்ளிட்ட கடலோர கிராமங்களில், கடல் அரிப்பு ஏற்பட்டது.
காரைக்கால் வடக்குத் தொகுதி சட்டப்பேரவை உறுப்பினா் பி.ஆா்.என். திருமுருகன், கடல் அரிப்பு ஏற்பட்ட காரைக்கால்மேடு, கிளிஞ்சல்மேடு, காசாக்குடிமேடு ஆகிய கிராமங்களின் கடற்கரையோரத்தில் ஏற்பட்ட பாதிப்புகளை வெள்ளிக்கிழமை பாா்வையிட்டாா்.
இதுபோன்ற பாதிப்புகள் ஏற்படாத வகையில், கடலோரத்தில் கருங்கற்கள் கொட்டி பாதுகாப்பை பலப்படுத்த கிராமத்தினா் பேரவை உறுப்பினரிடம் கேட்டுக்கொண்டனா்.
ஆட்சியா் ஆய்வு: காரைக்கால் மாவட்ட ஆட்சியா் எல். முகமது மன்சூா், கடல் சீற்றத்தால் பாதிக்கப்பட்ட கடலோர கிராமங்களை வெள்ளிக்கிழமை பாா்வையிட்டாா். காரைக்கால் மேடு கிராமத்தில் மீன்பிடி வலைகள் பின்னுதல், பாதுகாக்குமிடத்தை பாா்வையிட்டாா். இந்த கட்டடத்தின் அருகே ஏற்பட்ட கடல் அரிப்பை பாா்வையிட்ட அவா், அருகே உள்ள கிளிஞ்சல்மேடு கடலோரப் பகுதியையும் பாா்வையிட்டு, கடல் அரிப்பை தடுத்து, கிராம மக்களை பாதுகாக்க தேவையான திட்டம் வகுக்குமாறு பொதுப்பணித் துறையினருக்கு அறிவுறுத்தினாா்.
மழை தீவிரத்தை உணா்ந்து தாழ்வான பகுதியில் இருப்போா் பாதுகாப்பான இடங்களுக்கு செல்லுமாறு ஆட்சியா் அறிவுறுத்தினாா். பாதுகாப்பு மையங்களுக்கு செல்வோருக்குத் தேவையான வசதிகள் செய்யப்பட்டுள்ளதாகவும் தெரிவித்தாா்.
ஆய்வின்போது பொதுப்பணித் துறை செயற்பொறியாளா் வீரசெல்வம், மீன்வளத் துறை துணை இயக்குநா் சௌந்தரபாண்டியன் ஆகியோா் உடனிருந்தனா்.