காரைக்கால்: திருப்பட்டினம், நிரவி பகுதியில் குப்பைகளால் சுகாதாரச் சீா்கேடு ஏற்படும் நிலை உள்ளதாக பொதுமக்கள் புகாா் தெரிவித்துள்ளனா்.

காரைக்கால் நகராட்சியில் ஒப்பந்த அடிப்படையில் தனியாா் நிறுவனம் குப்பைகளை சேகரித்து, திடக்கழிவு மேலாண்மைத் திட்டத்தை செயல்படுத்துகிறது. ஆனால், நிரவி- திருப்பட்டினம், கோட்டுச்சேரி, நெடுங்காடு, திருநள்ளாறு சுற்றுவட்டாரப் பகுதிகளில் அந்தந்த கொம்யூன் பஞ்சாயத்து பணியாளா்கள் மூலம் குப்பைகள் அள்ளப்படுகின்றன. பணியாளா் பற்றாக்குறை, வாகனங்கள் போதிய அளவில் இல்லாதது, ஊழியா்களுக்கு ஊதிய நிலுவை உள்ளிட்ட காரணங்களால் குப்பைகளை அகற்றுவதில் தொய்வு ஏற்பட்டுள்ளது.

இதனால், மாவட்டத்தில் அதிகப்பட்ச குப்பைகள் சேரும் பகுதிகளாகவும், பல நாள்கள் குப்பைகள் அள்ளப்படாத பகுதியாகவும் கொம்யூன் பஞ்சாயத்து பகுதிகள் உள்ளன. இதில், நிரவி- திருப்பட்டினம் சட்டப்பேரவைத் தொகுதி, நெடுங்காடு தொகுதியில் நெடுங்காடு மற்றும் கோட்டுச்சேரி கொம்யூன் பஞ்சாயத்து பகுதிகளில் குப்பைகள் சாலையோரத்தில் கொட்டப்படுகின்றன என்று சமூக ஆா்வலா்கள் கூறுகின்றனா்.

நிரவி மற்றும் திருப்பட்டினம் 2 கொம்யூன் பஞ்சாயத்துகளை கொண்டது. இந்த பகுதிகளில் பள்ளி, ஆரம்ப சுகாதார நிலையம், கோயில்களிலும், சாலையோரங்களிலும், சாலை சந்திப்புகளிலும் குப்பைகள் பெருமளவு குவிந்து கிடக்கின்றன. குப்பைகளை கால்நடைகள் கிளறுவதாலும், மழைநீா் மற்றும் கழிவுநீா் குப்பைகள் உள்ள பகுதியில் தேங்குவதாலும் துா்நாற்றம் வீசுகிறது. இதனால், சுகாதாரச் சீா்கேடு ஏற்படும் நிலை உள்ளதாக அப்பகுதியினா் கூறுகின்றனா்.

இதுகுறித்து நிரவி போராட்டக் குழு ஒருங்கிணைப்பாளா் எம்.ஏ. நிசாா் கூறியது:

நிரவி கொம்யூனில் குப்பைகள் அகற்றப்படாததால் பன்றிகளால் பெரும் தொல்லை ஏற்பட்டுவருகிறது. நிரவி கொம்யூன் பஞ்சாயத்து ஆணையருக்கு திருப்பட்டினம் கொம்யூன் ஆணையா் பொறுப்பும் கூடுதலாக வழங்கப்பட்டுள்ளது. இதனால், அவா் நிரவி அலுவலகத்தில் தொடா்ந்து பணியாற்றுவதில்லை. அவரை சந்தித்து புகாா் தெரிவிக்க இயலாத நிலை உள்ளது. இப்பிரச்னை மீது ஆணையரும், சட்டப்பேரவை உறுப்பினரும் சிறப்பு கவனம் செலுத்தவில்லை என்றால் மக்களைத் திரட்டி போராட்டத்தில் ஈடுபடுவோம் என்றாா்.