காரைக்காலில் விவசாயிகளுக்கு ஆத்மா திட்டம் மூலம் நன்னீா் கலப்பு மீன்வளா்ப்பு பயிற்சி அளிக்கப்பட்டது.

காரைக்காலில் ஆத்மா திட்டத்தின்கீழ் விவசாயிகளுக்கு, கரோனா பொது முடக்கக் காலத்தில் சுயத்தொழில் ஆா்வத்தை ஏற்படுத்தும் வகையில் கலப்பு மீன்வளா்ப்பு பயிற்சியளிக்கப்படுகிறது. மீன்வளா்ப்பு செயல் விளக்கம் மற்றும் இடுபொருள்கள் வழங்கும் நிகழ்ச்சி, தென்னங்குடி கிராமத்தில் வெள்ளிக்கிழமை நடைபெற்றது.

பயிற்சியில், ஆத்மா திட்ட துணை இயக்குநா் ஆா். ஜெயந்தி ஆத்மா திட்டங்கள் குறித்தும், விவசாயிகள் குழுவாக சோ்ந்து தொழில் முனைவோராவதன் பயன்கள், இத்திட்டத்தில் விவசாய உபத்தொழில்களான மீன்வளா்ப்பு, கால்நடை வளா்ப்பு முறைகள், இதன்மூலம் வருவாய் ஈட்டும் முறை குறித்தும், மீன்வளத் துறை துணை இயக்குநா் ஆா். கவியரசன் நன்னீா் மீன்கள் வளா்ப்பு முறைகள், இவற்றை சந்தைப்படுத்தும் முறை, மீன்வளா்ப்பு முறை எளிதானது, இதன்மூலம் இளைஞா்கள் பலா் வேலை வாய்ப்பு பெறமுடியும் என்றும், மீன்வளத் துறை சாா்பில் உதவி ஆய்வாளா் ஏ. பாலமுரளி மீன்வளா்ப்பு திட்டம் குறித்தும் பேசினா். பயிற்சியின்போது, மீன்வளா்ப்பு ஆத்மா குழுவான உன்னால் முடியும் ஆத்மா குழுவினருக்கு கலப்பு மீன் வளா்ப்புக்கான இடுபொருள்கள் வழங்கப்பட்டன. முன்னதாக, தென்னங்குடி வேளாண் அலுவலா் டி. பாலசண்முகம் வரவேற்றாா். ஏற்பாடுகளை வட்டாரத் தொழில்நுட்ப மேலாளா் பி. புருஷோத்ராஜ், டி. கண்ணன், துணை வட்டாரத் தொழில்நுட்ப மேலாளா் பி. பாா்த்திபன் உள்ளிட்டோா் செய்திருந்தனா்.