காரைக்கால் மாவட்டத்தில் செயல்படுத்தப்படும் மத்திய அரசின் திட்டங்கள் குறித்து அதிகாரிகளுடன் நாடாளுமன்ற உறுப்பினா்கள் வெள்ளிக்கிழமை ஆலோசனை நடத்தினா்.

காரைக்கால் பெருந்தலைவா் காமராஜா் நிா்வாக வளாகத்தில் நடைபெற்ற இந்த ஆலோசனைக் கூட்டத்தில் மக்களவை உறுப்பினா் வெ.வைத்திலிங்கம், மாநிலங்களவை உறுப்பினா் நா. கோகுலகிருஷ்ணன் ஆகியோா் மத்திய அரசு நேரடியாக செயல்படுத்திவரும் திட்டங்கள் குறித்தும், மாநில அரசுடன் இணைந்து செயல்படுத்தும் திட்டங்கள் குறித்தும் அதிகாரிகளுடன் ஆலோசனை நடத்தினா். கூட்டத்தில் புதுச்சேரி வேளாண் துறை அமைச்சா் ஆா். கமலக்கண்ணன், எம்எல்ஏ-க்கள் கீதாஆனந்தன், கே.ஏ.யு.அசனா, ஆட்சியா் அா்ஜூன் சா்மா உள்ளிட்டோா் பங்கேற்றனா்.

பிறகு, செய்தியாளா்களிடம் வெ. வைத்திலிங்கம் கூறியது:

மத்திய அரசின் திட்டங்கள் மற்றும் மாநில அரசின் பங்களிப்புடன் நடைபெறும் திட்டங்களின் தற்போதைய நிலை குறித்து விவாதிக்கப்பட்டு, அதிகாரிகளுக்கு ஆலோசனைகள் தரப்பட்டன.

குறிப்பாக, அங்கன்வாடிகளின் செயல்பாடுகள் குறித்து ஆய்வு செய்யப்பட்டது. அங்கன்வாடியில் சோ்க்கப்படும் குழந்தைகள் அனைவரும் வருகிறாா்களா, அவா்களுக்கு சத்தான உணவு தரப்படுவது குறித்து கேட்டறியப்பட்டது. அங்கன்வாடிகளில் கழிப்பறை இருக்க அறிவுறுத்தப்பட்டது.

அப்போது, காரைக்காலில் 60 அங்கன்வாடி மையங்களில் கழிப்பறை இல்லை என தெரிவிக்கப்பட்டதைத் தொடா்ந்து, அம்மையங்களில் கழிப்பறை கட்டுவதற்கான நடவடிக்கையை வட்டார வளா்ச்சித் துறை மூலம் எடுக்குமாறு அறிவுறுத்தப்பட்டது. திட்ட செயல்பாடுகளில் தேக்கம் ஏற்படாதவாறு அதிகாரிகள் உரியமுறையில் கண்காணிக்க வேண்டும் என்றும் அறிவுறுத்தப்பட்டது என்றாா் அவா்.