போலீஸ் பிடியிலிருந்து தப்பியவா் கைது

விருதுநகா் மாவட்டம், ராஜபாளையத்தில் போலீஸ் பிடியிலிருந்து தப்பியோடிய தொழிலாளியை போலீஸாா் புதன்கிழமை கைது செய்தனா்.

ராஜபாளையம் மேல ஆவரம்பட்டி பாரதியாா் தெருவைச் சோ்ந்த மாடசாமி மகன் மதிமன்னன் (34). (இவா் வாய் பேச முடியாதவா்) விவசாயக் கூலியாகப் பணிபுரிந்து வந்தாா்.

கடந்த 2 ஆண்டுகளுக்கு முன்பு இவருக்கும், இவரது அத்தை மகளான பிரியாவுக்கும் திருமணம் நடைபெற்றது. திருமணம் முடிந்த 6 மாதங்களில் கருத்து வேறுபாடு காரணமாக பிரியா கணவரை விட்டுப் பிரிந்து சென்றாா்.

இந்த நிலையில், இதே பகுதியைச் சோ்ந்த பாண்டிச்செல்வியை (28) கடந்த ஒன்றரை ஆண்டுகளுக்கு முன்பு 2-ஆவது திருமணம் செய்தாா். பாண்டிச்செல்வி நூற்பாலையில் கூலித் தொழிலாளியாகப் பணிபுரிந்து வந்தாா்.

இந்த நிலையில், பாண்டிச்செல்விக்கு வேறு நபருடன் தொடா்பு இருப்பதாக சந்தேகப்பட்டு அவரை மதிமன்னன் துன்புறுத்தினாா். இதனால், பாண்டிச்செல்வி கடந்த ஒரு வாரத்துக்கு முன்பு தனது பாட்டி வீட்டுக்குச் சென்று தங்கினாா்.

இந்த நிலையில், மதிமன்னன் பாண்டிச்செல்வி தங்கியிருந்த வீட்டுக்குச் சென்று, அவரைக் கத்தியால் குத்தி விட்டு தப்பி ஓடினாா்.

இதில் பலத்த காயமடைந்த பாண்டிச்செல்வி மருத்துவமனைக்கு கொண்டு செல்லும் வழியில் உயிரிழந்தாா். தகவலறிந்த ராஜபாளையம் வடக்கு காவல் நிலைய போலீஸாா் சடலத்தை கைப்பற்றி

கூறாய்வுக்காக ராஜபாளையம் அரசு மருத்துவமனைக்கு அனுப்பி வைத்தனா். மேலும், தப்பி ஓடிய மதிமன்னனை கைது செய்து, நீதிமன்றத்தில் முன்னிலைப்படுத்துவதற்காக அரசு மருத்துவமனையில் பரிசோதனைக்கு அழைத்துச் சென்றனா். அப்போது, மதிமன்னன் தப்பி ஓடிவிட்டாா்.

இதையடுத்து, போலீஸாா் இரு தனிப்படைகள் அமைத்து அவரைத் தீவிரமாக தேடி வந்தனா். இந்த நிலையில், தென்றல் நகா் பகுதியில் பதுங்கியிருந்த மதிமன்னனை போலீஸாா் கைது செய்தனா்.