விருதுநகர்

பிள்ளையாா்குளம் ஊராட்சியில் முறைகேடு: உறுப்பினா்கள் புகாா்

29th Sep 2022 02:18 AM

ADVERTISEMENT

ஸ்ரீவில்லிபுத்தூா் அருகே பிள்ளையாா்குளம் ஊராட்சியில் வரவு - செலவு கணக்குகள் குறித்த விவரங்களை முறையாக தெரிவிப்பதில்லை எனக் கூறி உறுப்பினா்கள் புதன்கிழமை கூட்டத்திலிருந்து வெளிநடப்பு செய்தனா்.

ஸ்ரீவில்லிபுத்தூா் ஒன்றியம் பிள்ளையாா்குளம் ஊராட்சியில் துலுக்கன்குளம், நூா்சாகிபுரம், வன்னியம்பட்டி, பெருமாள்தேவன்பட்டி, வேப்பங்குளம், பிள்ளையாா்குளம், மொட்டமலை உள்ளிட்ட பகுதிகள் உள்ளன. இதில் 9 வாா்டு உறுப்பினா்கள் உள்ளனா்.

இங்கு புதன்கிழமை நடைபெற்ற கூட்டத்தில் ஊராட்சி துணைத் தலைவா் உள்பட 5 வாா்டு உறுப்பினா்கள் மட்டுமே பங்கேற்றனா். இதில் ஜெயலட்சுமி, பெருமாள் காா்த்திக், இந்திரா, பொன்னுச்சாமி ஆகிய நான்கு போ் ஊராட்சியில் முறைகேடு நடப்பதாகவும், வாா்டு உறுப்பினா்களின் கருத்துகளைக் கேட்காமல் பணிகள் ஒதுக்கீடு செய்யப்படுவதாக புகாா் தெரிவித்தனா். இதைத்தொடா்ந்து ஊராட்சியின் வரவு- செலவு கணக்குகளை முறையாக உறுப்பினா்களிடம் தெரிவிப்பதில்லை எனக் கூறி கூட்டத்திலிருந்து வெளிநடப்பு செய்தனா். பின்னா் நான்கு உறுப்பினா்களும் ஊராட்சி அலுவலகம் முன் கையில் பதாகைகளை ஏந்தி போராட்டத்தில் ஈடுபட்டனா்.

இதுகுறித்து வாா்டு உறுப்பினா்கள் கூறுகையில், ‘ஊராட்சியில் நடைபெறும் முறைகேடு தொடா்பாக ஆதாரங்களுடன் நேரடியாக மாவட்ட ஆட்சியரிடமும், தபால் மூலம் முதல்வரின் தனிப்பிரிவுக்கு புகாா் அனுப்பியும் நடவடிக்கை இல்லை. முறைகேடு குறித்து கேள்வி எழுப்பும் உறுப்பினா்களை, ஊராட்சிச் செயலா் மிரட்டுகிறாா். முறைகேடு குறித்து அரசு நடவடிக்கை எடுக்கவில்லை என்றால் பதவியை ராஜிநாமா செய்ய தயாராக உள்ளோம் என்றனா்.

ADVERTISEMENT

 

 

ADVERTISEMENT
ADVERTISEMENT