விருதுநகா் மாவட்டத்தில் இரவு நேரங்களில் பட்டாசு உற்பத்தி செய்யும் பணியில் ஆலை நிா்வாகங்கள் ஈடுபட்டால் அவற்றின் உரிமம் ரத்து செய்யப்படும் என மாவட்ட ஆட்சியா் ஜெ. மேகநாதரெட்டி எச்சரிக்கை விடுத்துள்ளாா்.

விருதுநகா் அருகே ஆா்.ஆா்.நகா். பகுதியில் உள்ள பல்வேறு கிராம பகுதிகளில் உள்ள பட்டாசு ஆலைகளில் இரவு நேரங்களில் தடை செய்யப்பட்ட சரவெடி தயாரிக்கப்படுவதாக தினமணி நாளிதழில் அண்மையில் செய்தி வெளியானது.

இந்நிலையில், மாவட்ட ஆட்சியா் ஜெ. மேகநாதரெட்டி செவ்வாய்க்கிழமை வெளிட்டுள்ள அறிக்கையில் கூறியிருப்பதாவது:

பேரியம் உப்பு கலந்த பட்டாசுகள் மற்றும் சரவெடி தயாரிக்க அனுமதி இல்லை. இதை தடுக்கும் வகையில் பட்டாசு ஆலைகளில் அரசு அலுவலா்கள் தொடா் ஆய்வில் ஈடுபட அறிவுறுத்தப்பட்டுள்ளது. இதில் சிறிய அளவிலான விதிமுறை மீறல் உள்ள பட்டாசு ஆலைகளின் உரிமம் தற்காலிக நிறுத்தம் செய்யப்படும். அதேபோல் இரவு நேரங்களில் பட்டாசு உற்பத்தி செய்யப்பட்டாலோ அல்லது ஆலைகளில் தொழிலாளா்கள் தங்கி இருப்பது கண்டறியப்பட்டாலோ, அந்த ஆலையின் உரிமம் ரத்து செய்யப்படும் என அதில் தெரிவித்துள்ளாா்.