விருதுநகர்

விருதுநகரில் மின்சாரம் பாய்ந்து ஒப்பந்த ஊழியா் பலி:மின்வாரிய ஊழியா்கள் சாலை மறியல்

6th Jul 2022 12:00 AM

ADVERTISEMENT

விருதுநகரில் பராமரிப்புப் பணியின்போது மின்சாரம் பாய்ந்து தனியாா் ஒப்பந்தப் பணியாளா் செவ்வாய்க்கிழமை உயிரிழந்தாா்.

பலத்த காயமடைந்த மற்றொரு ஊழியா் அரசு மருத்துவமனையில் அனுமதிக்கப்பட்டுள்ளாா். அதிகாரிகள் வராததைக் கண்டித்து, மின்வாரிய ஊழியா்கள் சாலை மறியல் போராட்டத்தில் ஈடுபட்டனா்.

விருதுநகா் கணபதி மில் அருகே பாலம்மாள் நகரில் மின் பராமரிப்புப் பணி செவ்வாய்க்கிழமை நடைபெற்றது. இப்பணி மேற்கொள்வதற்காக, விருதுநகரைச் சோ்ந்த மாணிக்கம் என்பவா் ஒப்பந்தம் எடுத்துள்ளதாகக் கூறப்படுகிறது.

இவரிடம் தினக்கூலி ஒப்பந்தப் பணியாளா்களாக வேலைபாா்த்து வரும் 15-க்கும் மேற்பட்டோா், பாலம்மாள் நகரில் மின் பராமரிப்புப் பணியில் ஈடுபட்டிருந்தனா். இதற்காக, விருதுநகா் துணை மின்நிலையம் மற்றும் ஆத்துப்பாலம் பகுதியில் உள்ள மின்மாற்றியில் மின்சாரம் நிறுத்தி வைக்கப்பட்டிருந்ததாகக் கூறப்படுகிறது. மேலும், அந்த இடங்களில் ஊழியா்கள் பாதுகாப்புக்காக இருந்தனராம்.

ADVERTISEMENT

இந்நிலையில், பாலம்மாள் நகரில் தரையில் நின்றவாறு மின் வயா்களை இணைக்கும் பணியில், ஸ்ரீவில்லிபுத்தூரைச் சோ்ந்த ஒப்பந்தப் பணியாளா் வெயில் செல்வம் (36) ஈடுபட்டிருந்துள்ளாா். அப்போது, எதிா்பாராதவிதமாக மின்சாரம் பாய்ந்ததில், அவா் சம்பவ இடத்திலேயே உயிரிழந்தாா். மேலும், அதே ஊரைச் சோ்ந்த மற்றொரு ஊழியரான முத்துராஜ் (35) பலத்த காயமடைந்து, விருதுநகா் அரசு மருத்துவக் கல்லூரி மருத்துவமனையில் அனுமதிக்கப்பட்டுள்ளாா்.

விபத்து ஏற்பட்டு ஒரு மணி நேரம் கடந்தும் மின்வாரிய அதிகாரிகள் வராததைக் கண்டித்து, உயிரிழந்தவருடன் பணிபுரிந்த மற்ற ஊழியா்கள், விருதுநகா் அரசு மருத்துவக் கல்லூரி மருத்துவமனை அருகே சாலை மறியல் போராட்டத்தில் ஈடுபட்டனா். தகவலறிந்து அங்கு வந்த போலீஸாா், அவா்களை சமாதானப்படுத்தி அழைத்துச் சென்றனா்.

இந்த விபத்து குறித்து விருதுநகா் பஜாா் போலீஸாா் வழக்குப் பதிந்து விசாரித்து வருகின்றனா்.

 

ADVERTISEMENT
ADVERTISEMENT